منڈگوڈ ہائی وے پرڈکیتی معاملے میں بھٹکل کے ملزمین گرفتار
منڈگوڈ20؍جنوری (ایس اونیوز) منڈگوڈ ہائی وے پر موٹر گاڑیوں کو روک کر لوٹنے والی ایک6رکنی ٹولی کو پولیس نے گرفتار کیا ہے۔جن کے بارے میں بتایا جاتا ہے کہ ان کا تعلق ضلع شمالی کینرا کے بھٹکل اور اڈپی ضلع کے شیرور سے ہے۔
گرفتارشدگان کی شناخت بھٹکل کے محمد ایس ابراہیم (۲۳سال)، سید مصطفیٰ سید محمد(۲۲سال)، اکرم سید محمد حسین(۲۱سال)، رضوان عبدالعزیز (۲۶سال)، کمار مادیوا کورور(۲۶سال) اور شیرور کے رہنے والے محمد نوفل(۲۲سال) کے طور پر کی گئی ہے۔
اطلاع کے مطابق تڑس۔ہانگل ہائی وے پر دو کاروں میں سوار ہوکر آنے والی ایک ۶ رکنی ٹولی نے لاری کو روک کر اس کے ڈرائیور کے پاس موجود موبائل فون چھین لیاتھا۔ اس تعلق سے بنکاپور پولیس اسٹیشن میں شکایت درج کی گئی تھی۔ تحقیقات کرنے والی پولیس ٹیم نے ہائی وے پر ڈکیتی کرنے کے دوران اس ٹولی کو گرفتار کیا ہے۔پولیس کا کہنا ہے کہ سرسی مضافاتی پولیس تھانہ حدود میں سرکاری اسکول کا تالاتوڑ کر چوری کی واردات انجام دینے کی بات اس ٹولی نے قبول کرلی ہے۔اس کے علاوہ تڑس۔ منڈگوڈ ہائی وے پر ابھی حال ہی میں سرسی سے تعلق رکھنے والے ایک انجینئر کی کار روک کر لوٹنے کی ناکام کوشش بھی اس ٹولی کی طرف سے کی گئی تھی۔ اس تعلق سے سرسی کے کیشو مورتی نے اپنے ساتھ پیش آنے والے بھیانک واقعے کی تفصیل فیس بک پر شیئر کی تھی۔
ہائی وے پر ڈکیتی کی کوشش کیے جانے کے تعلق سے مسافروں کے اندر خوف و ہراس پیدا ہوگیا ہے۔ عوام کا کہناہے کہ پولیس کو ہائی وے پر گشت تیز کردینا چاہیے اور مسافروں کے تحفظ کو یقینی بنانے کے لئے اقدامات کرنا چاہیے۔