ریپ کے الزام پر داتی مہاراج کی صفائی ،میں حاسدوں کی سازش کا شکارہوا ہوں
نئی دہلی20جون(ایس او نیوز؍آئی این ایس انڈیا) ایک لڑکی کی جانب سے ریپ کا الزام لگانے کے بعد داتی مہاراج نے اپنی صفائی دی ہے۔ بدھ کو پریس کانفرنس میں داتی مہاراج نے کہا کہ میرے آشرم میں ابھیشیک اگروال نام کا آدمی رہا جس پر میں نے خوب بھروسہ کیا۔ اس نے کچھ لوگوں کے ساتھ میرے نام پر لین دین بھی کیا۔ اب وہی دو لوگ نوین گپتا اور سچن جین مجھ سے 32 کروڑ روپے مانگ رہے ہیں، جبکہ مجھے اس لین دین کی کوئی اطلاع نہیں ہے۔ سچن اورنوین بھی اسی آشرم میں رہے ہیں۔ سچن نے اپنے حامیوں کے ساتھ میری گاڑی گڑگاؤں میں روکی تھی اور مجھے دیکھ لینے کی دھمکی بھی دی تھی۔ مجھے لگتا ہے میرے خلاف یہ سازش کی گئی ہے۔ داتی مہاراج نے کہا کہ متاثرہ لڑکی کے والد اور ان دونوں کے موبائل نمبر کی جانچ سے تمام صاف ہو جائے گا کہ سچائی کیا ہے۔ میں بھی بیٹیوں کا باپ ہوں اور بیٹیوں کا احترام کرتا ہوں۔ جب بھی پولیس پولیس تحقیقات کے لئے بلائے گی، ضرور جاؤں گا۔ غور طلب ہے کہ راجستھان کی رہائشی ایک پچیس سالہ لڑکی نے خود ساختہ بابا داتی مہاراج اور اس کے شاگردوں پر اس کے ساتھ کئی بار ریپ کا الزام لگایا ہے۔ جنوبی دہلی کے فتح پور بیری تھانے میں لڑکی نے داتی مہاراج کے خلاف شکایت دی ہے۔ لڑکی نے پولیس کو بتایا کہ وہ قریب ایک دہائی سے اس نام نہاد خودساختہ باباکی پیروکار تھی؛ لیکن داتی مہاراج اور اس کے شاگردوں کی طرف سے بار بار عصمت دری کئے جانے کے بعد وہ اپنے گھر راجستھان لوٹ گئی تھی۔ لڑکی نے الزام لگایا ہے کہ بابا کی ایک اور خاتون پیروکارداتی مہاراج کے کمرے میں زبردستی بھیجتی تھی۔ منع کرنے پر دھمکاتی تھی کہ وہ سب سے انکشاف کرے گی کہ وہ دیگر شاگردوں کے ساتھ بھی جنسی تعلق قائم کرتی ہے ۔