ڈی کے شیوکمار کے پی سی سی صدارت کے مضبوط ترین دعویدار
بنگلورو:24/مئی(ایس او نیوز) کرناٹک پردیش کانگریس کمیٹی صدر کے طور پر وزیر توانائی ڈی کے شیوکمار کے نام کو تقریباً قطعیت دی جاچکی ہے، اگلے چند ہی دنوں میں ان کے نام کا اعلان باضابطہ کردیا جائے گا۔ کانگریس ذرائع نے بتایاکہ ریاستی کانگریس قائدین کے مشورہ کے بعد اے آئی سی سی انچارج برائے کرناٹک وینو گوپال نے اعلیٰ کمان کو یہ رپورٹ پیش کی ہے کہ اکثر پارٹی کارکنوں کی رائے ہے کہ اسمبلی انتخابات کا سامنا ایک نئے کے پی سی سی صدر کی قیادت میں ہونا چاہئے۔اس کیلئے پچھلے تین دن سے جاری مشاورت کے دوران بیشتر لیڈران نے نجی رائے ظاہر کی ہے کہ بے پناہ تنظیمی صلاحیتوں کے مالک ڈی کے شیوکمار کو کے پی سی سی صدارت دی جانی چاہئے،تاکہ آنے والے اسمبلی انتخابات میں پارٹی ان کی صلاحیتوں کا بھرپور استفادہ کرسکے۔ بتایاجاتاہے کہ پارٹی اعلیٰ کمان کے حلقوں میں بھی اس بات پر غور کیا جارہا ہے کہ یاتو ڈی کے شیوکمار کو کے پی سی سی صدارت دی جائے یا پھر موجودہ صدر ڈاکٹر پرمیشور کو اس عہدہ پر برقرار رکھا جائے۔ان دونوں کے علاوہ کسی اور کے نام کو اعلیٰ کمان کی طرف سے خاطر میں لائے جانے کے امکانات بہت کم ہیں۔ وزیر اعلیٰ سدرامیا اور ان کے گروپ کی طرف سے یہ کوشش ہورہی ہے کہ ان کے معتمد سابق وزیر ایس آر پاٹل یا وزیر آبپاشی ایم بی پاٹل کو کے پی سی سی صدارت دلادی جائے۔