بھٹکل میں لاری کی راہ گیر سے ٹکر؛ راہ گیر شدید زخمی؛ منی پال منتقل
بھٹکل11/ڈسمبر (ایس او نیوز) یہاں سرپن کٹہ نیشنل ہائی وے پر ایک سلینڈر سے بھری لاری راہ گیر کو ٹکر مارنے کے نتیجے میں راہ گیر بری طرح زخمی ہوگیا جس کی شناخت ناگراج ایرپا نائک (32) کی حیثیت سے کی گئی ہے۔
ذرائع سے ملی اطلاع کے مطابق بیلکے کا رہنے والا ناگراج سڑک کنارے سے گذرنے کے دوران اچانک سلینڈر سے بھری لاری اس پر چڑھ گئی، اس کا ایک پاوں بری طرح زخمی ہوگیا ہے، البتہ حالت بھی کافی نازک بتائی گئی ہے۔
مقامی لوگوں نے ناگراج کو فوری طور پر بھٹکل سرکاری اسپتال منتقل کیا، جہاں ابتدائی طبی امداد کے بعد اسے منی پال لے جایا گیا ہے۔ حادثہ منگل کی شب قریب نو بجے پیش آیا۔ لاری مینگلور سے کاروار جارہی تھی۔
اطلاع ملتے ہی مضافاتی پولس تھانہ کے پی ایس آئی مسٹر روی موقع پر پہنچے اور لاری سمیت ڈرائیور نیتیانند شنکر نائک کو اپنی تحویل میں لیا۔ پولس معاملے کی مزید چھان بین کررہی ہے۔
