خاتون ٹیم کی تیز گیند باز جھولن گوسوامی کے پاس نہیں ہے محبت کے لئے وقت
کولکاتہ،30جولائی(ایس اونیوز؍آئی این ایس انڈیا)آئی سی سی خواتین ورلڈ کپ کے فائنل میں پہنچنے والی ہندوستانی ٹیم کی تیز گیند باز جھولن گوسوامی اس وقت کسی رومانٹک شراکت میں شامل ہونے کی جلدی میں نہیں ہیں۔ان کا خیال ہے کہ انسان کو ایک وقت ایک ہی چیز پر ہی توجہ دینا چاہئے اور اس وقت ان کی توجہ کرکٹ پر ہے۔جھولن( (34نے ایک نیوز چینل سے بات چیت میں کہا کہ میں کھیل پر توجہ مرکوز کر رہی ہوں،میں اس کے ساتھ اتنی مصروف ہوں کہ کسی اور چیز کے لئے وقت نہیں دے سکتی،اگر میں کسی رشتے کے لئے وقت نہیں دے سکتی تو میں اس سے انصاف بھی نہیں کر پاؤں گی،میں ایک وقت میں ایک کام کرنا پسند کرتی ہوں۔انہوں نے کہا کہ میں نے اپنے دوستوں کو دیکھا ہے جنہیں ایک وقت میں دو چیزوں کو متوازن کرنے کے لئے جدوجہد کرنا پڑا تھا،اس کے لئے بہت وقت ہے۔
جھولن سے جب پوچھا گیا کہ وہ کرکٹ کے بعد ملنے والے فارغ وقت میں کیا کرتی ہیں؟ اس کے جواب میں انہوں نے کہا کہ مجھے فلموں اور موسیقی کا شوق ہے۔ورلڈ کپ میں سیمی فائنل اور فائنل سے پہلے میں نے اپنے دماغ کو باقی چیزوں سے الگ کرنے کے لئے کچھ کلاسک بنگالی فلمیں دیکھے تھی۔ہندوستان کو 23جولائی کو لارڈز کے میدان پر کھیلے گئے خواتین ورلڈ کپ کے فائنل میچ میں میزبان انگلینڈ کو ہاتھوں نو رنز سے شکست کا سامنا کرنا پڑا تھا۔انہوں نے خواتین کرکٹ کھلاڑیوں کے لئے بنیادی ضرروریات تک رسائی کی بات پر زور دیا۔
انہوں نے کہا کہ بنگال کرکٹ ایسوسی ایشن نے ڈسٹرکٹ کرکٹ شروع کرکے اچھا کام کیا ہے، لیکن مجھے لگتا ہے کہ کولکاتہ میں کلب کرکٹ کی پوزیشن کو دیکھنا ضروری ہے۔ان کے پاس اچھے بنیادی ڈھانچے ہیں اور انہیں خواتین کی پہنچ میں لانا چاہئے۔