کیا شیرورمٹھ کے سوامی کی موت کثرت شراب نوشی اور ناجائز تعلقات کے نتیجے میں ہوئی ؟معاملہ کی تحقیقات اور جانچ کیلئے 7ٹیمیں تشکیل
بنگلور :20/جولائی ( ایس او نیوز) اڈپی شرورمٹھ کے سوامی لکشمی ورتیرتھ سوامی جی کی مشتبہ حالات میں ہوئی موت پر انہیں قتل کیے جانے کاشبہ ظاہر کیاگیاتھا جس کے نتیجہ میں اڈپی ضلع ایس پی نے اس معاملہ کی ہر زاویہ سے جانچ کے لیے پولیس کی 7ٹیمیں تشکیل دی ہیں ۔ شرور علاقہ میں یہ افواہیں بھی اڑائی جارہی ہیں کہ سوامی کثرت سے شراب نوشی کیاکرتے تھے اور ان کے چند عورتوں کے ساتھ بھی ناجائز تعلقات تھے ۔ دوعورتوں کے درمیان ان کے تعلقات کولے کر جھگڑے بھی چل رہے تھے اور ان جھگڑوں کی وجہ سے ہی سوامی جی کی موت ہوئی ہوگی ۔
ان کی موت کو لے کر خود پیجاور مٹھ کے سوامی نے بھی اسی طرح کا شبہ ظاہر کیاہے ۔ پیجاور مٹھ کے سوامی نے کہاہے کہ انہوں نے خود کئی مرتبہ شرورمٹھ کے سوامی سے کہاتھا کہ وہ شراب نوشی ترک کردیں ۔ پولیس کو یہ ساری معلومات حاصل ہونے پر ضلع ایس پی نے ان کی موت کی وجوہات معلوم کرنے مختلف زایوں سے تحقیقات شروع کردی ہیں اور 7مختلف ٹیمیں اب معاملہ کی جانچ کررہی ہیں ۔ اڈپی رتھ بیدی میں واقع شرور مٹھ اور نپادی مٹھ میں پولیس اب مٹھ کے دیگر افراد سے پوچھ تاچھ کررہی ہے۔ سوامی جی کے سونے کے کمرے اور رہائشی علاقہ کا تفصیلی جائزہ لیاجارہاہے ۔ یہاں فنگر پرنٹس اور فورینسک لیاب کے افسران مختلف چیزوں کو اپنی تحویل میں لی ہیں۔
16جولائی کو شرور مٹھ میں ونامہااتسوا پروگرام میں سوامی جی نے حصہ لیاتھا اور طلباء نے انہیں پرساد کھلایاتھا۔ پرساد کھانے کے بعد ان کی صحت بگڑنے لگی تھی ۔ 17جولائی کو انہیں اسپتال میں داخل کیاگیا اور 18جولائی کو اڈپی کے ایم سی اسپتال میں منتقل کیاگیا۔ علاج کے دوران 19جولائی کی صبح ان کی موت واقع ہوئی تھی ۔ سوامی کی پوسٹ مارٹم رپورٹ ابھی پولیس کے ہاتھ نہیں لگی ہے ۔ پولیس اس معاملے کی ہر زاویہ سے جانچ کررہی ہے ۔ تحقیقات کے پیش نظر پولیس نے شرور مٹھ میں بھگتوں کے داخلہ پر پابندی لگادی ہے اور پورے مٹھ کو اپنی تحویل میں لے کر وہاں جانچ کررہی ہے ۔ شبہ ظاہر کیاجارہاہے کہ کسی نے سوامی جی کو پرساد میں زہر ملاکر دیاتھا۔ سوامی جی کے بھائی نے بھی مطالبہ کیاہے کہ ان کی موت کی وجوہات کی مکمل جانچ کروائی جائے ۔ اگراس میں سچائی ہے کہ یہ قتل کی وارادات ہے تو قاتلوں کو ڈھونڈنکالاجائے۔ پولیس اب ان دوعورتوں سے بھی پوچھ تاچھ کرنے والی ہے جن کے ساتھ ان کے ناجائز تعلقات تھے اور سوامی جی کی دیگر سرگرمیوں اور ان کے کس کے ساتھ دوستانہ تعلقات تھے اس کی بھی جانچ کی جارہی ہے ۔