جناردھن ریڈی کی عرضئ ضمانت پر عدالت کا فیصلہ محفوظ
بنگلورو، 13؍نومبر(ایس او نیوز) سابق ریاستی وزیر اور بلاری کے کان مالک جناردھن ریڈی کی طرف سے ایک فراڈ کمپنی کو بچانے کی مبینہ کوشش انہیں اس قدر مہنگی پڑی کہ آج تیسرے دن بھی انہیں جیل میں ہی گزارنا پڑا۔ ان کی ضمانت کے لئے دائر کی گئی عرضی پر آج عدالت نے اپنا فیصلہ کل تک محفوظ کرلیا۔ ایک دھوکہ باز کمپنی کو انفورسمنٹ ڈائرکٹوریٹ کی جانچ سے بچانے کے عوض 57 کلو سونا اس کمپنی سے حاصل کرنے کے الزامات کا سامنا کرنے والے جناردھن ریڈی کو شہر کی سنٹرل کرائم برانچ پولیس نے گرفتار کیا اور گزشتہ روز سے شہر کی پرپنا اگراہارا جیل میں قید ہیں، گرفتاری کے فوراً بعد انہیں مجسٹریٹ کے روبرو پیش کیاگیا تھا جہاں انہیں 14دنوں تک عدالتی تحویل میں بھیج دیاگیا، جس کے بعد جناردھن ریڈی کے وکیلوں نے ان کی ضمانت کے لئے عدالت سے رجوع کیا، کل مرکزی وزیر اننت کمار کی موت کے سبب سرکاری چھٹی کا اعلان ہوجانے کی وجہ سے عدالت میں کارروائی نہیں چل سکی، آج عدالت میں جناردھن ریڈی کی عرضی ضمانت پر سماعت پوری ہوگئی اور عدالت نے اس سلسلے میں اپنا فیصلہ کل تک کے لئے محفوظ کرلیا۔
جناردھن ریڈی کی طرف سے سینئر وکیل ہنومنت رایپا نے پیروی کی جبکہ سی سی بی کے وکیلوں نے جناردھن ریڈی کو ضمانت دئے جانے کے خلاف عدالت میں اپنے اعتراضات دائر کئے ، جناردھن ریڈی کے وکیل نے الزام لگایا کہ اس کیس کی جانچ کے ذمہ دار افسر جناردھن ریڈی سے اپنی پرانی رقابت کا انتقام لینے کی کوشش کررہے ہیں اسی لئے فوری طور پر تحقیقاتی افسر کو بدلا جائے، اس سلسلے میں ریاستی ہائی کورٹ میں بھی دو رٹ عرضیاں داخل کی گئی ہیں جن پر ابھی تک سماعت نہیں ہوئی ہے۔ اس دوران جناردھن ریڈی کی ضمانت کے لئے جاری کوششیں تیز ہوگئیں اور آج عدالت نے ضمانت کی عرضی پر سماعت مکمل کرلی کل دوپہر تک فیصلہ منظر عام پر آنے کا امکان ہے۔