ممبئی،07؍ ستمبر (ایس او نیوز؍آئی این ایس انڈیا) بوری ولی اسٹیشن پر آر پی ایف نے جمعرات کی شب سوریہ نگر ایکسپریس میں سفر کر رہے ایک مسافر کو 17 کلو گرام سونا لے جاتے ہوئے گرفتار کیاہے۔برآمد سونے کی قیمت کروڑوں روپے میں بتائی جارہی ہے۔ پولس جمعہ کے روز پکڑے گئے ملزم منیش کو عدالت میں پیش کرنے کی تیاری کررہی ہے۔ بتایا جاتا ہے کہ مینش 17 کروڑ سونے کے ساتھ سوریہ نگر ایکسپریس کے ایس۔9 کوچ میں بیٹھا تھا۔منیش کا بیگ دیکھ کر ٹی سی کو شک ہوا۔اس کے بعد ٹی سی نے اس کی اطلاع آر پی ایف کو دی۔ بوری ولی اسٹیشن میں آر پی ایف نے ایس ۔9 میں چھاپہ مار کر بیگ سمیت منیش کو گرفتار کرلیا۔ذرائع کے مطابق ممبئی سے اس طرح احمدآباد، سورت جیسے شہروں میں کمیشن پر ڈمی لوگوں سے سونا اور دیگر قیمتی سامان کا تبادلہ بڑے پیمانے پر تاجروں کے کے ذریعہ کیا جاتا ہے۔ اس معاملہ میں پکڑا گیا منیش ڈمی بتایا جارہا ہے۔ پولس اس معاملہ میں اصل مجرم کو تلاش کر رہی ہے۔