انسداد جرائم کیلئے پولیس کو بویریا کی تربیت دی جائے گی: پرمیشور
بنگلورو:18/اپریل(ایس او نیوز)ریاستی پولیس کو سائبر کرئم اور جدید قسم کے جرائم سے نمٹنے اور خواتین کو تحفظ فراہم کرنے کیلئے مستعد کرنے کے مقصد سے حکومت نے بویرین طرز کی تربیت سے آراستہ کرنے کا فیصلہ کیا ہے۔آج اس سلسلے میں بویریاکے ایک وفد نے وزیر داخلہ ڈاکٹر جی پرمیشور سے ملاقات کی اور اس تربیت کے متعلق تفصیلی بات چیت کی۔ ودھان سودھا میں ہوئی میٹنگ کے دوران بویریا کے نمائندے اروند ہوبر کی قیادت میں وفد نے ڈاکٹر پرمیشور سے اس تربیت کے بارے میں تبادلہئ خیال کیا۔میٹنگ کے بعد اخباری نمائندوں سے بات چیت کرتے ہوئے وزیر داخلہ نے کہاکہ صوبہئ بویریا کے ساتھ ریاستی حکومت نے پہلے ہی تجارتی، سیاحتی، صنعتی،آئی ٹی بی ٹی اور دیگر امور پر باہمی تعاون کے معاہدے کئے ہیں۔ تکنیکی مہارت کے اعتبار سے بویریا کی پولیس کو دنیا کی پولیس فورسوں میں کافی آگے شمار کیاجاتاہے۔ اسی لئے سائبر جرائم اوردیگرجدید طرز کے معاملوں سے نمٹنے کیلئے بویریاکے طریقہئ کار کو اپنانے کے سلسلے میں اتفاق کیا گیا ہے۔ انہوں نے کہاکہ اس مقصد کیلئے ریاست کے چنندہ پولیس افسران کو بویریا کے ماہرین خصوصی تربیت سے آراستہ کریں گے۔جدید ترین ٹیکنالوجی کا استعمال کرتے ہوئے سائبر جرائم سے نمٹا جائے گا۔ ساتھ ہی خواتین کی حفاظت پر پولیس فورس خصوصی توجہ دے گی۔آج کی میٹنگ میں وزیر داخلہ کے مشیر کیمپیا، اڈیشنل چیف سکریٹری، ریاستی پولیس کے ڈائرکٹر جنرل آر کے دتہ، پولیس کمشنر پروین سود وغیرہ موجود تھے۔