ممبئی،25 مارچ (ایس او نیوز؍آئی این ایس انڈیا) مہاراشٹر کے بیڑ ضلع میں این سی پی کی ایک کونسلر کے شوہر کابھیڑ نے پیر کو پیٹ پیٹ کر قتل کر دیا۔بھیڑ کو شک تھا کہ اغوا کے ایک معاملے میں وہ شکلیگرکمیونٹی کی مدد کر رہے ہیں۔

پولیس کے ایک افسر نے بتایا کہ ضلع کے پرلی۔ویجناتھ نگرکے پھلے نگر علاقے میں 50سالہ پاڈرگ گایکواڑ پر بھیڑ نے تلواروں، درانتی اور لاٹھی سے حملہ کر دیا۔افسر نے کہاکہ پیر کی صبح ہوئے حملے میں گایکواڑ شدید زخمی ہو گئے۔انہیں فوری طور پر نزدیکی اسپتال لے جایا گیا جہاں ڈاکٹروں نے انہیں مردہ قرار دے دیا۔

پولیس نے بتایا کہ یہ حملہ مبینہ طور پر 16 سالہ لڑکے کے چار ماہ پہلے ہوئے اغوا کے واقعہ سے منسلک ہے۔شکلیگرکمیونٹی کے ارکان نے مبینہ طور پر لڑکے کو اغوا کیا تھا کیونکہ لڑکے کے ان کی کمیونٹی کی ایک لڑکی کے ساتھ عشق تھا۔اس سلسلے میں اس وقت پورنا پولیس تھانے میں اغوا کا معاملہ درج کیا گیا تھا۔کچھ دنوں بعد لڑکے کی لاش برآمد ہوئی تھی۔ اس واقعہ سے مقامی لوگ اور اس کے خاندان والے بہت ناراض تھے۔سبھاجی نگر تھانے کے انسپکٹر بالاساحب پوار نے کہاکہ بھیڑ کو شک تھا کہ گایکواڑ اغوا معاملے میں شکلیگرکمیونٹی کی مدد کر رہے ہیں۔بھیڑ میں نابالغ لڑکے کی ماں بھی شامل تھی۔انہوں نے بتایا کہ دو خواتین سمیت 11 لوگوں نے گایکواڑ پر حملہ کیا۔ ان میں سے پانچ کو قتل کے الزام میں گرفتار کر لیا گیا ہے۔انہوں نے بتایا کہ دیگر ملزمان کی تلاش جاری ہے۔شکلیگرفرقہ کے لوگ پوری ریاست میں موجود ہیں۔روایتی طور پر یہ لوگ لوہے کے ہتھیار بناتے ہیں۔