نئی دہلی، 9 /دسمبر(ایس او نیوز /آئی این ایس انڈیا)جموں وکشمیر کے دونوں طرف کی کوآرڈی نیشن کمیٹیاں ’ہارٹ ٹو ہارٹ ٹاک‘ (دل سے دل کی بات) کی پھر سے شروعات کرنے کے لئے دہلی میں اپریل 2017میں میٹنگ کریں گی۔ اس دل سے دل کی بات چیت کی شروعات پورے جموں وکشمیر کوآرڈی نیشن کمیٹی کے کنوینر  پروفیسر بھیم سنگھ نے کی تھی۔ اس کی پہلی میٹنگ2005 میں اور دوسری میٹنگ2007میں جموں اور دہلی دونو ں جگہ ہوئی تھی۔ان میٹنگوں میں جموں وکشمیر کے دونوں طرف کے معروف لیڈران شامل ہوئے تھے جن میں ڈاکٹر کرن سنگھ، سردار محمد عبدالقیوم خان، ڈاکٹر فاروق عبداللہ، پروفیسرعبدالغنی بھٹ،جناب شبیر شاہ اور دیگر شامل تھے۔میٹنگ کے منتظمین نے بتایا تھا کہ یہ میٹنگوں اور بات چیت کی سیریز ہوگی جو 2005میں ہوئی پھر بعد میں 2007میں ہوئی۔پروفیسر بھیم سنگھ نے ان میٹنگوں کا سہرا حکومت پاکستان اور ہندستان کے وزیراعظم ڈاکٹر منموہن سنگھ کے سر باندھا جنہوں نے جموں وکشمیر کے دونوں طرف کے دانشوروں اور قیادت کے مل بیٹھ کر بات چیت کرنے کے دروازے کھولے۔انہوں نے ہارٹ ٹو ہارٹ کمیٹی کے چیرمین کے گزشتہ برس انتقال پر گہرے رنج و غم کا اظہار کرتے ہوئے کہاکہ جموں وکشمیرکی دونوں طرف معروف شخصیت کو کمیٹی کااگلا چیرمین بنایا جائے گا۔پروفیسر بھیم سنگھ نے امید ظاہر کی کہ کمیٹی کی آئندہ میٹنگ اپریل۔2017میں غالباً دہلی میں ہوگی۔انہوں نے اس کے لئے منتظمہ کمیٹی قائم کی ہے جس کا اعلان جنوری2017میں صلاح ومشورہ کے بعد کیا جائے گا۔ انہوں نے کہاکہ وہ  اس میٹنگ میں جموں وکشمیر کے دونوں طرف کے نمائندوں کی شرکت کو یقینی بنائیں گے۔