معمولی مسئلے پر مشتعل ہونے والے ٹریفک کانسٹیبل نے بزرگ شہری کی سرعام پٹائی کردی۔ ویڈیو وائرل ہونے پر کانسٹیبل کو کیا گیا معطل
چکمگلورو27؍اگست (ایس او نیوز) ایک بزرگ شہری کو بائک سواری کے وقت سر پر ہیلمٹ نہ پہننے پر ٹریفک پولیس کانسٹیبل نے انتہائی ہتک آمیز لہجے میں ڈانٹا اور جرمانہ بھرنے کے لئے کہا۔اس پر بزرگ شہری نے کانسٹیبل کو تمیز سے بات کرنے کے لئے کہا تو کانسٹیبل سبھاش المٹی اتنا مشتعل ہوگیا کہ اس نے اس شخص کی سر عام بری طرح پٹائی کردی۔
پولیس کے ذریعے ایک بزرگ شہری کی پٹائی کامنظر جب ایک راہگیر اپنے موبائل کیمرے میں ریکارڈ کرنے لگا تو کانسٹیبل سبھاش اس راہگیر پر چڑھ دوڑا اور اسے ویڈیوڈیلیٹ کرنے کی دھمکی دی۔ لیکن مذکورہ ویڈیو کلپ جب سوشیل میڈیا پر وائرل ہوگئی اور ہرطرف سے پولیس کانسٹیبل کے رویے پر ناراضی جتائی گئی تو پولیس نے اپنے طور پر کارروائی کرتے ہوئے کانسٹیبل سبھاش کو معطل کردیا۔
چکمگلورو کے ایس پی لکشمی پرساد نے بتایا کہ’’ چکمگلورو کے شرینگار سرکل کے پاس ایک عام آدمی پر پولیس عملے کی طرف سے حملہ کرنے کے بارے میں پولیس افسران کو اطلاع ملی۔ ابتدائی تحقیقات سے یہ بات ثابت ہوگئی کہ حملے کی بات ایک حقیقت ہے ۔ اس لئے عام آدمی پر حملہ کرنے کی پاداش میں چکمگلورو ٹریفک پولیس اسٹیشن سے وابستہ کانسٹیبل سبھاش المٹی کو معطل کردیا گیا ہے۔‘‘