ایم جے اکبر کے خلاف رچی گئی سازش،گواہ وینو صندل
نئی دہلی:7/دسمبر (ایس او نیوز/آئی این ایس انڈیا)ایم جے اکبر بدنامی کیس میں پٹیالہ ہاؤس کورٹ میں اکبر کی جانب سے دو گواہوں کا بیان درج کرایا گیا۔ اس سے پہلے ایک گواہ کا بیان درج کیا جا چکا ہے۔ جمعہ کو دوسرے گواہ سنیل گجرال اور تیسرے گواہ وینو صندل نے اپنا بیان درج کرایا۔ اب اکبر کے 6 گواہوں میں سے تین اور گواہوں کے بیان درج کئے جانے ہیں۔پریا رمانی کے خلاف کئے گئے اس بدنامی کیس میں سنیل گجرال نے کورٹ کو دیئے اپنے بیان میں کہا کہ وہ ایم جے اکبر کو گزشتہ 40 سال سے جانتے ہیں۔ 1980 سے ان کی دوستی ہے اور اکبر کے کولکاتہ قیام کے دوران ان کی پہلی ملاقات ہوئی تھی۔ جب سوشل میڈیا پر انہوں نے اکبر کو لے کر ٹویٹس دیکھے تو انہیں بہت سخت حیرت ہوئی ۔اس کیس میں وینو صندل کا بھی بیان جمعہ کو ہی درج کیا گیا۔ وینو صندل نے کورٹ کو دیئے اپنے بیان میں کہا کہ وہ ایم جے اکبر کو گزشتہ 25 سال سے جانتی ہیں اور اسی طرح برسوں سے ہی وہ صحافت کے پیشہ میں ہیں۔ کبھی بھی اکبر نے کسی کے ساتھ زیادتی نہیں کی، یہ الزام ان کے کردار مسخ کرنے اور ان کی شبیہ مسخ کرنے کی سازش ہے۔اس سے پہلے جوتیکا باسو پہلی گواہ کے طور پر اپنا بیان گزشتہ تاریخ درج کرا چکی ہے۔ پٹیالہ ہاؤس کورٹ اب اس معاملے کی اگلی سماعت 11 جنوری کو کرے گا۔