وزیر اعلیٰ کی طرف سے منڈیا ضلع کے ایس پی کو لتاڑ، آئی پی ایس افسران کی لابی سدرامیا پر برہم
بنگلورو:21/اپریل(ایس او نیوز) وزیر اعلیٰ سدرامیا کی طرف سے منڈیا ضلع کے ایس پی سدھیر کمار ریڈی کو برسر عام لتاڑے جانے پر اعلیٰ افسران نے شدید برہمی کا اظہار کیا ہے۔ ایک جلسہئ عام کے دوران انتہائی اہم عہدہ پر فائز ایس پی پر کسی کی بھی طرف سے نکتہ چینی کرنا اور ان کی کار کوروکنا افسوسناک قرار دیاگیا ہے۔ افسران نے کہاکہ وزیر اعلیٰ کے ساتھ موجود افسران کو انہیں صحیح حالات کا علم فراہم کرنا چاہئے تھا، اور ساتھ ہی وزیر اعلیٰ سدرامیا کو بھی عجلت میں اس طرح کاتبصرہ کرنے سے گریز کرنا چاہئے تھا۔ برسر عام ایک تقریب کے دوران وزیر اعلیٰ کی طرف سے ایک آئی پی ایس آفیسر کو صیغہئ واحد میں مخاطب کرکے گیٹ آؤٹ کہنا وزیر اعلیٰ کی ہٹ دھرمی کا ثبوت ہے۔ ان افسران نے کہاکہ وزیراعلیٰ کی طرف سے اس طرح کا رویہ اور وہ بھی ضلع کے ایس پی کے ساتھ ان کے ماتحتوں کی موجودگی میں درست نہیں ہے۔ اس طرح کے تبصرہ کے بعد مسٹر سدھیر کمار ریڈی کس طرح منڈیا ضلع کے ایس پی کے طور پر اپنے ماتحتوں کے ساتھ کام کرسکیں گے؟۔ وزیر اعلیٰ کے اس رویہ کی وجہ سے دیانتدار افسران کھل کر کام نہیں کرپائیں گے اور ان کے حوصلے ٹوٹ جائیں گے۔اعلیٰ افسران نے کہاکہ وزیراعلیٰ سدرامیا کو اپنا رویہ تبدیل کرنا چاہئے۔کل ملولی اسمبلی حلقہ میں ایک پروگرام کے دوران بی جے پی کارکنوں کی طرف سے وزیر اعلیٰ سدرامیا کی کار روکے جانے پر وزیر اعلیٰ نے سخت برہمی کا اظہار کیا اور ایس پی کو آڑے ہاتھوں لیتے ہوئے صیغہئ واحد میں مخاطب کرکے کہاکہ تجھے کس نے آئی پی ایس آفیسر بنادیا اور بعد میں گیٹ آؤٹ کہہ کر آڑے ہاتھوں لیا۔