نئی دہلی،19 فروری(ایس او نیوز؍آئی این ایس انڈیا) پلوامہ دہشت گردانہ حملے پر پاکستانی وزیر اعظم عمران خان کے بیان کو لے کر کانگریس نے منگل کو ان پر نشانہ لگاتے ہوئے کہا کہ عمران دہشت گرد تنظیم جیش محمد کی زبان بول رہے ہیں۔کانگریس لیڈر اور پارٹی کے مرکزی ترجمان رندیپ سرجیوالا نے ٹویٹ کر کہاکہ غم زدہ اور شرمناک، پاکستانی وزیر اعظم عمران خان آج بھی جیش محمد کی زبان بول رہے ہیں۔ انہوں نے کہاکہ بھولئے مت کی اندرا گاندھی اور فوج نے 1971 میں پاکستان کے دو ٹکڑے کر کے بنگلہ دیش کو آزادی دلائی تھی اورپاکستان کے 91000 فوجیوں نے ڈھاکہ میں ہندوستانی فوج کے حوالے کیا تھا۔دراصل عمران خان نے پلوامہ دہشت گردانہ حملے میں قابل عمل معلومات شیئرکرنے پر پر سازش کنندگان کے خلاف کارروائی کرنے کی منگل کو ہندوستان کو یقین دہانی کرائی۔ساتھ ہی انہوں نے یہ بھی کہا کہ ان کے ملک کے خلاف کوئی بھی کارروائی کئے جانے پر اس کا جواب دیا جائے گا۔غور طلب ہے کہ پاکستان کی بنیاد دہشت گرد تنظیم جیش محمد کی طرف سے 14 فروری کو کیے گئے دہشت گردانہ حملے میں سی آر پی ایف کے 40 جوان شہید ہو گئے۔