بنگلورو،23/ستمبر(ایس او نیوز) ریاست میں آئندہ اسمبلی انتخابات کو نظر میں رکھ کر کانگرس نے ’’گھرگھر کانگریس‘‘ کے نام سے آج مہم کا آغاز کیا۔ اسمبلی انتخابات میں اپوزیشن بی جے پی اور جے ڈی ایس کو شکست دے کر اقتدار پرواپس لوٹ آنے کانگریس لیڈران نے ریاست کے تمام 224؍اسمبلی حلقوں میں گھر گھر جاکر کانگریس حکومت کی کارکردگی سے متعلق عوام کو روشناس کرانے کے لئے ایک حکمت عملی تیار کی ہے۔ گھر گھر کانگریس اسی حکمت عملی کا ایک حصہ ہے۔ اے آئی سی سی جنرل سکریٹری ورکن پارلیمان کے سی وینوگوپال جوکرناٹک میں پارٹی امور کے انچارج بھی ہیں نے شہر کے مارتھ ہلی میں گھر گھر کانگریس مہم کا افتتاح کرتے ہوئے کہاکہ تمام کانگریس لیڈروں کو اپنے ذاتی اختلافات بھلاکر متحد ہوکر انتخابات میں حصہ لینے ہی سے کانگریس کی جیت کو یقینی بنایا جاسکتا ہے۔ مہادیوپورہ اسمبلی حلقہ رام گنڈن ہلی سے کانگریس لیڈران جن میں وینوگوپال ،وزیراعلی سدارامیا، کے پی سی سی صدر ڈاکٹر جی۔ پرمیشور کارگزار صدر دنیش گنڈو راؤ، سابق مرکزی وزیر ورکن راجیہ سبھا ڈاکٹر کے۔ رحمن خان، ایم ویرپاموئیلی کئی ایک ریاستی وزراء اور دیگر شامل ہیں۔ حالیہ سی یل پی اجلاس میں گھر گھر کانگریس مہم چلانے کا فیصلہ کیاگیا تھا۔
حکومت کی کارکردگی: پچھلے ساڑھے چار سالوں کے دوران وزیراعلیٰ سدارامیا کی قیادت میں کانگریس حکومت کی کارکردگی اورکامیابی پرمشتمل ایک کتابچہ چھاپاگیا ہے۔ تقریب میں اس کتابچہ کا اجراء بھی عمل میں آیا۔ اس کتابچہ کے اعداد وشمار سے یہ ظاہر ہوتا ہے کہ پچھلے اسمبلی انتخابات کے دوران کانگریس نے اپنے انتخابی منشور میں جو وعدے کئے تھے ان میں سے تقریباً تمام پورے کئے گئے ہیں۔ پچھلے ساڑھے چار سالوں کے دوران حکومت نے کسانوں ،پسماندہ طبقات، اقلیتوں کی فلاح وبہبودی اور ان کی ترقی کے لئے جن اسکیموں کو جاری کیا ہے انہیں پارٹی ورکرس کے ذریعہ گھرگھر جاکر آگاہ کرنا اس مہم کا اہم مقصد ہے۔ گھر گھر کانگریس مہم کا آج آغاز ہوچکا ہے ریاست کے تمام اسمبلی حلقوں میں یہ مہم چلائی جائے گی۔ 15؍اکتوبر کو یہ مہم اختتام پر پہنچے گی ۔ کے پی سی سی کے ذریعہ اس مہم کے دوران استعمال کرنے ایک کروڑ ردس لاکھ کتابچے چھاپے گئے ہیں۔ اس مہم کے دوران ریاست کے تمام 224؍اسمبلی حلقوں میں عوامی جلسے منعقد کرنے کا فیصلہ کیاگیا ہے۔ ریاستی حکومت کی کارکردگی اور مختلف فلاحی اسکیموں کو عوام تک پہنچانے پارٹی ورکرس اور مقامی لیڈروں کو ہدایت دی ہے۔ پچھلے انتخابات کے دوران عوام سے کانگریس نے 165؍وعدے کئے تھے۔ ان میں سے155؍سے زیادہ وعدے پورے کئے جاچکے ہیں۔ بقیہ وعدے بھی بہت جلد پورے کرنے کا وزیراعلیٰ سدارامیا نے تیقن دیا ہے۔