کانگریس کے اندرونی جھگڑوں سے جادھو نے راضی نامہ دیا: جگدیش شٹر
ہبلی،5؍مارچ (ایس او نیوز) کانگریس والوں نے خواہ مخواہ اومیش جادھو پر شک کیا ، جس سے تنگ آکر انہوں نے آج اسمبلی و پارٹی رکنیت سے استعفیٰ دے دیا۔ یہ باتیں سابق وزیراعلیٰ جگدیش شٹر نے کہیں۔ ہبلی میں آج نامہ نگاروں سے بات چیت کے دوران انہوں نے کہاکہ کانگریس میں خانہ جنگی کی وجہ سے آج اومیش جادھو نے استعفیٰ دیا ہے۔ کانگریس والوں نے مقامی طور پر انہیں بہت تکلیف دی ہے۔ استعفیٰ کے ایک گھنٹے کے اندر ہی ان کا راضی نامہ منظور کیا جانا چاہئے۔ اسپیکر رمیش کو چاہئے وہ فوری طور پر ان کا استعفیٰ قبول کریں۔ ہماری پارٹی کے اصول وضوابط تسلیم کرتے ہوئے کوئی بھی پارٹی میں شامل ہوتا ہے تو ہم اس کا استقبال کریں گے۔ مخلوط حکومت کئی الجھنوں کاشکار ہے۔ انہوں نے مثال دیتے ہوئے کہاکہ کانگریس اور جے ڈی ایس جبری اور دباؤ کی شادی رچاکر صحیح طریقہ سے زندگی نہیں گزاررہے ہیں۔ جس سے کئی اراکین اسمبلی ناراض ہوگئے ہیں۔ اب یکے بعد دیگرے راضی نامہ دینے کا عمل شروع ہوگیا ہے۔ انہوں نے مزید کہاکہ آنجہانی امبریش کی بیوی سمالتا منڈیا سے کانگریس کا ٹکٹ طلب کررہی ہیں۔ ان کو پارٹی میں شامل نہیں کیا جارہا ہے۔ اگر سمالتا اپنی خواہش سے بی جے پی میں آتی ہیں تو ہم ان کا استقبال کریں گے۔