میں نے ابھی تک کانگریس چھوڑ کر بی جے پی میں شمولیت کا فیصلہ نہیں کیا ہے۔ یلاپور ایم ایل اے شیورام ہیبار کا بیان
کاروار 17؍ستمبر(ایس او نیوز) گزشتہ دو چار دنوں سے ریاستی مخلوط حکومت کو گرانے کے لئے بی جے پی کے آپریشن کنول کی باتیں سننے میں آرہی ہیں ۔اسی بیچ یلاپور حلقے کے رکن اسمبلی شیورام ہیبار کے تعلق سے بھی خبریں آ رہی تھیں کہ انہوں نے بی جے پی میں شامل ہونے کا فیصلہ کیا ہے اور اس تعلق سے اپنے حامیوں کے ساتھ میٹنگ میں صلاح و مشور ہ کیا ہے۔اس کے علاوہ اننت کمار ہیگڈے سے ملاقات کی خبربھی عام ہوگئی تھی۔
لیکن چار پانچ دنوں کی خاموشی کے بعد شیورام ہیبار نے خود وضاحت کی ہے کہ کانگریس چھوڑ کر بی جے پی میں شامل ہونے کے تعلق سے انہوں نے سوچا نہیں ہے۔ یہ جو افواہیں میڈیا میں پھیل گئی ہیں وہ سب ان کے وہم و گمان میں بھی نہ ہونے والی باتیں ہیں۔ شیورام ہیبار نے کہا کہ ان کے چاہنے والے حالانکہ ان پربی جے پی میں شامل ہونے کے لئے دباؤ ڈال رہے ہیں،جو کہ سیاست میں ایک عام سی بات ہے ۔ لیکن انہوں نے اس بارے میں ایک لمحے کے لئے بھی سوچا نہیں ہے۔
یاد رہے کہ اس سے قبل اسمبلی الیکشن کے نتائج آنے کے بعد بی جے پی نے جوڑتوڑ کی سیاست کا جو چکر چلایا تھا اس وقت بھی شیورام ہیبار کا نام اخباروں کی سرخیوں میں تھاکیونکہ خود کانگریس کی ریاستی قیادت نے کھلے عام کہا تھا کہ شیورام ہیبار کو ان کے گھر پر فون کرکے خریدنے کی کوشش کی گئی ہے۔ لیکن اس دوران بھی کچھ دنوں کی خاموشی کے بعد شیورام ہیبار نے ایسے کسی فون اور خریدنے کی کوشش بی جے پی کی طرف سے کیے جانے کا انکار کیا تھا۔ جس کی وجہ سے خود کانگریسی قیادت کی سبکی ہوگئی تھی۔
اس مرتبہ جب شیورام ہیبار کے کانگریس کو چھوڑ کر بی جے پی میں شامل ہونے کی خبریں میڈیا میں آئیں تو وضاحت کے لئے رابطہ کرنے پر ان کے دونوں موبائل فون سوئچ آف ہو گئے تھے۔ اس وجہ سے بھی اس گمان کو بڑی تقویت ملی کہ اس بار شاید وہ آپریشن کنول کا شکار ہوگئے ہیں۔ اس تعلق سے شیورام ہیبار نے سرسری طور پر یہ کہا کہ میڈیا میں آنے والی ہر بات پر سرکھپانا او روضاحت دینا ممکن نہیں ہوتا۔