بنگلورو،8؍نومبر ( ایس او نیوز) ریاست کے پانچ حلقوں میں ہوئے ضمنی انتخابات کے نتائج پر خوشی کااظہار کرتے ہوئے سابق وزیراعلیٰ سدارامیا نے آج کہا کہ بلاری کے لوگ اندھیرے سے نکل کر روشنی کی جانب رواں دواں ہیں ۔

ضمنی انتخابات کے نتائج سے متعلق ٹوئٹ کرتے ہوئے سدارامیا نے کہا کہ بلاری پارلیمانی حلقہ سے کانگریس امیدوار وی ایس اگرپا کی شاندار کامیابی سے ریڈی برادران کی کمر ٹوٹ گئی ہے ۔ اس حلقہ میں کانگریس کو کامیاب کرنے پر بلاری حلقہ کے ووٹروں کا شکریہ ادا کرتے ہوئے انہوں نے کہا کہ سچ کہا جائے تو اس حلقہ کے لوگ برسوں بعد اندھیرے سے باہر نکل کر روشنی کی جانب لوٹ آئے ہیں ۔جمکھنڈی اسمبلی حلقہ میں کانگریس امیدوار آنند نیام گوڈا کی کامیابی سے متعلق انہو ں نے کہا کہ آنند کی جیت یقینی تھی۔

بلاری میں کانگریس کی جیت پر اپنا ردعمل ظاہر کرتے ہوئے ریاستی وزیر ڈی کے شیوکمار نے کہا کہ تمام یہ جانتے ہیں کہ بلاری کی جیت کانگریس کے لئے کتنی اہم تھی؟ انہوں نے بتایا کہ انتخابات میں ہار اور جیت لازمی ہے ۔لیکن بلاری میں امن کے ساتھ انتخابات منعقد کرنے کا موقع فراہم کرنے کے لئے میں رکن اسمبلی سری راملو انا کا شکریہ ادا کرتا ہوں ۔پارٹی نے بلاری انتخابات کی ذمہ داری مجھے سونپی تھی میں نے یہ ذمہ داری پوری کی ہے ۔ بلاری کی مجموعی ترقی میرا خواب ہے میں اس کو انجام دینے کی بھرپور کوشش کروں گا۔

ریاست میں ہوئے ضمنی انتخابات میں کانگریس کی جیت پر خوشی کا اظہار کرتے ہوئے کے پی سی سی صدر دنیش گنڈو راؤ نے کہا ہے کہ ان انتخابات میں مخلوط پارٹیوں کی جیت سے ریاستی مخلوط حکومت کے حوصلے کافی بلند ہوئے ہیں ۔ ضمنی انتخابات کے نتائج اپوزیشن بی جے پی کے لئے بہت مایوس کن رہے۔ پہلے ہی سے اس کی امید تھی۔جمکھنڈی اسمبلی حلقہ سے کامیابی حاصل کرنے والے کانگریس امیدوار آنند نیام گوڈا نے کہا کہ اس حلقہ میں ان کے والد سدو نیام گوڈا کی خدمات اور حلقہ کے لئے کئے گئے ترقیاتی کاموں کے پیش نظر حلقہ کے ووٹروں نے انہیں یہ انعام دیاہے ۔انہوں نے کہاکہ جمکھنڈی حلقہ کی مجموعی ترقی کے لئے وہ ان کے والد کے نقش قدم پر چلیں گے ۔