ہبلی، 24؍مئی (ایس او نیوز؍ یو این آئی) بھارتیہ جنتا پارٹی (بی جے پی) کے سینئر لیڈر اور کرناٹک کے سابق وزیر اعلی جگدیش شیٹر نے آج کہا کہ ریاست میں کانگریس اور جنتا دل (ایس) کی مخلوط حکومت زیادہ مدت تک نہیں چل پائے گی اور یہ وقت سے پہلے ہی گر جائے گی۔مسٹر شیٹر نے یواین آئی سے بات چیت میں کہا کہ کانگریس مایوسی کی حالت میں ہے اور وہ خاموش نہیں رہے گی۔ اس کے ممبران اسمبلی کی تعداد 122 سے کم ہوکر 78 پر آ گئی ہے اور وہ جنتا دل (ایس) سے مکمل طور اقتدار پر قبضہ کرنے کی ہر ممکن کوشش کر سکتی ہے ۔انہوں نے کانگریس اور جنتا دل (ایس) کے اتحاد کو مصلحت آمیز قرار دیتے ہوئے الزام لگایا کہ یہ ریاستی اسمبلی انتخابات میں 104 نشستیں جیت کر سب سے بڑی پارٹی کے طور پر ابھری بی جے پی کو اقتدار سے دور رکھنے محض کھیل ہے ۔انہوں نے کہا کہ صرف 37 ممبران اسمبلی والی پارٹی کو حکومت کی قیادت کرنے کا موقع ملنا جمہوریت کا مذاق اڑانا ہے ۔ اس دن ریاست کے لئے ایک سیاہ دن تھا، جب مسٹر کمارسوامی نے وزیر اعلی کا عہدہ سنبھالا ۔انہوں نے مسٹر ایچ ڈی دیوے گوڑا کے 17 ممبران پارلیمنٹ کے ساتھ وزیر اعظم بن جانے کو یاد کرتے ہوئے کہا کہ ان کی حکومت زیادہ وقت تک نہیں چلی اور بہت کم وقت میں ہی گر گئی۔ مستقبل میں، کمارسوامی کی حکومت اسی صورت حال کی ایک مثال بنے گی ۔مسٹر شیٹر نے الزام لگایا ہے کہ پچھلی کانگریس حکومت نے ریاست کو 2 لاکھ کروڑ روپے سے زائد کے قرضوں میں پھنسا دیا ہے ۔ اس صورت حال میں، نئے وزیر اعلی کے لئے کسانوں کی قرض معافی کا اعلان فوری طور پر ممکن نہیں ہوگا اور مستقبل میں بھی ممکن نہیں ہوگا۔انہوں نے کہا کہ انتخابی مہم کے دوران، جے ڈی (ایس) نے اعلان کیا تھا کہ کسانوں کے تمام قرضوں کو اقتدار میں آنے کے بعد جلد ہی معاف کیا جائے گا، لیکن اس نے کانگریس کے ساتھ اتحاد کیا ہے اور اس سے ایسا ہوپانا ممکن نہیں ہوگا۔ایم پی اور بی جے پی کے سابق صدر پرہلاد جوشی نے کہا کہ اگر وزیر اعلی اپنی پارٹی کے منشور کے تحت کئے جانے والے وعدوں کو پورا کرنے میں ناکام رہے تو یہ فرض کرلیا جائے گا کہ جے ڈی (ایس) نے کسی بھی طرح سے اقتدار حاصل کرنے کا ہتھکنڈا اپنایا ہے ۔