راجستھان کے انتخاب میں ’گھس پیٹھیوں ‘ کا بھوت : کانگریس کے پاس نہ کوئی’ پالیسی‘ ہے، نہ لیڈر: امت شاہ
جے پورا،23؍ ستمبر (ایس او نیوز؍آئی این ایس انڈیا) بی جے پی کے قومی صدر امت شاہ نے ہفتہ کو کہا کہ کانگریس ملک کا ’بھلا‘ نہیں کر سکتی؛ کیونکہ اس کے پاس نہ کوئی لیڈر ہے اور نہ ہی کوئی پالیسی ہے۔ راجستھان کے یک روزہ دورہ پر آئے شاہ گنگا پور سٹی میں ایک اجتماع سے خطاب کر رہے تھے۔
شاہ نے کہا کہ کانگریس ملک کا بھلا نہیں کر سکتی، راجستھان کا بھلا نہیں کر سکتی کیونکہ اس کے پاس نہ’ لیڈر‘ ہے، نہ’ پالیسی‘۔ کانگریس کی طرف سے راجستھان میں آئندہ اسمبلی انتخابات کے لئے وزیر اعلی کے عہدے کے لئے کسی لیڈر کا نام کا اعلان نہیں کئے جانے پر بھی شاہ نے کہا کہ جس پارٹی کا لیڈر مقرر نہ ہو، جس پارٹی کی پالیسی طے نہ ہو تو کیا اسے ووٹ دینا چاہئے؟۔
شاہ نے کہا کہ وزیر اعظم نریندر مودی نے ملک کو محفوظ کرنے کا کام کیا ہے۔ امیت شاہ نے کہا کہ کروڑوں کی تعداد میں ملک میں درانداز ملک کو دیمک کی طرح چاٹ گئے ہیں جنہیں نکالنے کے لئے مرکزی حکومت نے ان آرسی کے عمل کو شروع کی لیکن کانگریس کو اس سے بھی دقت ہے اور اسے اپنے ووٹ بینک کی فکر ہے۔ لیکن بی جے پی حکومت ایک ایک دراندازوں کو چن چن کر ووٹر لسٹ سے ہٹانے کا کام کرے گی۔ اس کے ساتھ ہی شاہ نے دہرایا کہ بھارتیہ جنتا پارٹی کی حکومت راجستھان میں ایک مضبوط درخت کی جڑ کی طرح ہے جسے کوئی ہٹا نہیں سکتا۔
انہوں نے یاد دلایا کہ 2014 کے عام انتخابات میں یہاں کے ووٹروں نے تمام 25 سیٹیں بی جے پی کی جھولی میں ڈالی دی تھیں۔ شاہ کے مطابق جب سے مرکز میں نریندر مودی کی حکومت بنی ہے راجستھان دن دگنی اور رات چوگنی اضافہ کر رہا ہے۔شاہ نے کہا کہ وزیر اعظم مودی نے کشمیر سے کنیا کماری تک اور کام روپ سے کچھ تک پورے ملک میں ’وکاس‘ کی گنگا بہادی ہے ۔