یڈیورپا کے گھر کے سامنے کانگریسی کسانوں کا احتجاج
بنگلورو،26؍مئی(ایس او نیوز) قومی بینکوں میں کسانوں نے جو قرضہ جات لئے ہیں ان کو معاف کرنے کیلئے مرکز کی مودی حکومت پر زور دینے کی مانگ کرتے ہوئے آج کانگریس سے وابستہ کسانوں نے ریاستی بی جے پی صدر بی ایس یڈیورپا کی رہائش گاہ کے روبرو احتجاجی مظاہرہ کیا۔ان لوگوں نے مطالبہ کیا کہ کسانوں کے کم از کم 50 فیصد قرضہ جات معاف کرنے کیلئے وزیر اعظم پر زور دیا جائے۔ان کسانوں نے یڈیورپا پر الزام لگایا کہ کسانوں کی فلاح وبہبود کے معاملے میں دوغلے بیانات دے کر یڈیورپا رعیت طبقے کے ساتھ ہمدردی کا ناٹک کررہے ہیں۔ رعیتوں کے قرضوں کی معافی کے متعلق گورکھ سنگھ کمیٹی سفارشات کو روبہ عمل لانے کیلئے مرکزی حکومت پر زور دینا چاہئے تھا۔ساتھ ہی مرکز پر اس بات کیلئے بھی زور دینے کی ضرورت تھی کہ کستوری رنگن رپورٹ کو لاگو نہ کیا جائے اور ڈاکٹر سوامی ناتھن رپورٹ کو لاگو کیاجائے۔ کلسا بنڈوری ، مہادائی اور کاویری مسائل پر فوری قدم اٹھاتے ہوئے ریاست کے ساتھ انصاف کیاجائے۔ ریاست میں سپاری کی فصلوں کوجو نقصان پہنچا ہے ان کی بھرپائی کیلئے مرکز فوراً مداخلت کرے۔