پٹنہ:8/جنوری (ایس او نیوز/آئی این ایس انڈیا)مہا گٹھ بندھن میں سیٹوں کو لے کر آر جے ڈی اور کانگریس آمنے سامنے ہیں ۔ آج پارٹی اراکین کی میٹنگ میں کانگریس کے ممبران اسمبلی نے بہار کی کل 40 لوک سبھا سیٹوں میں سے 20 سیٹوں پر دعوی ٹھوک دیا۔ وہیں آر جے ڈی نے تیجسوی یادو کے چہرے کو آگے کر الیکشن لڑنے کی بات کہہ کر معاملہ پھنسا دیا۔پیر کو دن میں مچھلی۔ چاول پر مہا گٹھ بندھن کی پارٹیاں ایک ساتھ رہنے کا دم بھرتے رہیں۔ شام میں میٹنگ بھی کی لیکن آج سب کی اپنی بانسری اپنا راگ دیکھنے کو ملا۔ کانگریس اسمبلی ٹیم لیڈر سدانند سنگھ کے گھر میں ممبران اسمبلی کی میٹنگ ہوئی۔ سب نے ایک سر میں کہا بیس سیٹ سے کم منظور نہیں ہے۔ اراکین اسمبلی نے اس کے لئے راہل گاندھی کو خط لکھنے تک کی بات کہی۔ کانگریس کے رام دیو رائے، اجیت شرما، راجیش رام اور سدھارتھ کمار نے کھل کر اپنی بات کہی۔ادھر اپیندر کشواہا کی پارٹی کے ریاستی صدر بھودیو چودھری نے نشستوں کی تعداد تو نہیں بتائی لیکن اپنا عزم صاف کر دیا۔ کل کی میٹنگ میں سات سیٹوں کا دعوی کیا گیا تھا لیکن کیمرے میں انہوں نے کچھ نہیں کہا۔وہیں آر جے ڈی کے ریاستی صدر رام چندر پروے نے واضح کردیا کہ قیادت تو تیجسوی ہی کریں گے۔ رام چندر پروے نے کہا کہ کشمیر سے لے کر کنیا کماری تک آر ایس ایس اور بی جے پی کا صفایا کرنا ہے ۔ اس کی شروعات بہار میں تیجسوی پرساد یادو کی قیادت میں ہو چکی ہے۔ 40 سیٹوں پر مہا گٹھ بندھن کا قبضہ ہو، یہی عزم کل کیا گیا تھا ۔