لوک سبھا انتخابات سے قبل پارٹی مضبوط کرنے میں مصروف کانگریس
پٹنہ /نئی دہلی:22/جولائی(ایس او نیوز/آئی این ایس انڈیا)لوک سبھا انتخابات سے پہلے کانگریس نے بہار میں عوام کی سطح پر تنظیم کو مضبوط بنانے کی کوشش شروع کی ہے جس کے تحت وہ ریاست کے ہر گاؤں میں کمیٹی کا قیام اور پنچایت صدر کی تقرری کرنے جا رہی ہے۔ اس کے ساتھ ہی کانگریس نے ممبران اسمبلی اور قانون ساز کونسل اراکین کو ضلع چارج کی ذمہ داری سونپنے کا بھی فیصلہ کیا ہے۔ پارٹی بھلے ہی راشٹریہ جنتا دل کے ساتھ اتحاد میں انتخاب لڑے لیکن وہ سیاسی طور پر اہم اس ریاست میں ایک بار پھر گاؤں گاؤں میں اپنی موجودگی درج کرانا چاہتی ہے۔ کانگریس کے بہار انچارج شکتی سنگھ گوہل کا کہنا ہے کہ اگلے چند ماہ کے اندر اندر بہار کے تمام پنچایتوں اور دیہات میں پارٹی کی تنظیم صدور کا تقرر کیا جائے گا۔گوہل نے کہا کہ بہار میں صوبائی، ضلعی اور ڈویژن کی سطح پرہمار ی تنظیم موجود ہے۔ ہمیں یہ محسوس ہوا کہ جب تک ہم پنچایتوں اور اور دیہی سطح پر تنظیم کی تعمیر و ترقی کے لیے کام نہیں کریں گے اس وقت تک عوامی سطح پر ہم اپنی موجودگی درج نہیں کرا سکتے؛اس لئے ہم نے ہر پنچایت میں پارٹی صدر مقرر کرنے اور ہر گاؤں میں پارٹی کی کمیٹی بنانے کا فیصلہ کیا ہے ۔ شکتی سنگھ گوہل کا کہنا ہے کہ بہار میں تقریبا نو ہزار پنچایتیں ہیں۔ ہر پنچایت کے تحت ایک یا ایک سے زیادہ گاؤں ہیں۔ کئی پنچایتوں میں صدر کی تقرری ہو گئی ہے۔ دیہات میں کمیٹیاں بنانے کا کام بھی شروع ہو رہا ہے۔ گوہل نے کہا کہ اپنے پنچایت یا گاؤں میں مثبت شناخت رکھنے والے اور اچھی شبیہ کے افراد کو پنچایت صدر اور کمیٹی کا ممبر بنایا جا رہا ہے۔ گاؤں کی آبادی کے حساب سے کمیٹی میں ارکان کی تعداد مقرر کی جائے گی۔