بی جے پی اعلیٰ کمان کو رقم ادا کرنے کے متعلق مذاکرہ،یڈیورپا اور اننت کمار کے خلاف لوک آیوکتہ اور اے سی بی میں شکایت
بنگلورو،15؍فروری(ایس او نیوز) بی جے پی اعلیٰ کمان کو رقم ادا کرنے کے متعلق مرکزی وزیر اننت کمار اور ریاستی بی جے پی صدر یڈیورپا کے درمیان ہوئی بات چیت کی سی ڈی منظر عام پر آتے ہی ان کے خلاف تحقیقات کرنے اور ریاستی بی جے پی دفتر پر چھاپہ مارنے کا مطالبہ کرتے ہوئے ریاستی کانگریس کے شعبۂ قانون وانسانی حقوق کے چیرمین سی ایم دھننجیا نے لوک آیوکتہ سے مطالبہ کیا ہے۔آج انہوں نے لوک آیوکتہ جسٹس وشواناتھ شٹی سے ملاقات کرکے اس سلسلے میں شکایت درج کی۔ شکایت جمع کرنے کے بعد اخباری نمائندوں سے بات چیت کرتے ہوئے انہوں نے کہاکہ دونوں کے خلاف انسداد کرپشن قانون کے تحت کارروائی کی جانی چاہئے۔اتوار کے روز بی جے پی دفتر میں ہوئے پروگرام کے دوران یڈیورپا اور اننت کمار کے درمیان اعلیٰ کمان کو رقم ادا کئے جانے کے متعلق بات چیت ہوئی ہے۔ اس سلسلے میں کانگریس قائدین نے ایک سی ڈی بھی منظر عام پر لائی ہے۔انہوں نے کہاکہ اعلیٰ کمان کو رشوت ادا کرنا ایک سنگین جرم ہے، اسی لئے اس معاملے کی سختی سے جانچ کی جائے، فوری طور پر ملیشورم میں بی جے پی کا دفتر بند کیا جائے ، اور یہاں پر موجود جدیدترین ملٹی میڈیا آلات کو ضبط کرکے ان میں سے اس مذاکرہ کی تفصیلات یکجا کی جائیں۔ انہوں نے کہاکہ اس سلسلے میں انہوں نے انسداد کرپشن بیورو میں بھی شکایت درج کرائی ہے۔ انہوں نے کہاکہ دونوں کے درمیان بات چیت کی سی ڈی اور اس سلسلے میں الیکٹرانک میڈیا میں دکھائے گئے کلیپنگس بھی لوک آیوکتہ اور اے سی بی کو دئے گئے ہیں۔ دھننجیا نے کہاکہ سی ڈی کے مشمولات کی بنیاد پر یڈیورپا اور اننت کمار کو اپنے اپنے عہدوں سے استعفیٰ دیدینا چاہئے۔ یا پھر ریاستی کانگریس کا محکمۂ قانون دونوں کے خلاف ریاست گیر تحریک شروع کرے گا۔ انہوں نے کہاکہ اس بات چیت کے متعلق دونوں رہنماؤں نے اپنی طرف سے کوئی تردید نہیں کی ہے، اسی لئے دونوں کے خلاف کارروائی بہت ضروری ہے۔