ضمنی انتخابات کے بعد کانگریس جے ڈی ایس اتحاد اور مضبوط ہوگا: جی پرمیشور
بنگلورو،17؍اکتوبر(ایس او نیوز) تین لوک سبھا اور دو اسمبلی حلقوں کے ضمنی انتخابات کے بعد ریاست میں کانگریس جے ڈی ایس اتحاد پہلے سے زیادہ مضبوط اور مستحکم ہوگا۔ یہ بات نائب وزیراعلیٰ ڈاکٹر جی پرمیشور نے کہی۔
ودھان سودھا کے روبرو ناسک جانے والی گاڑیوں کو ہری جھنڈی دکھانے کے بعد اخباری نمائندوں سے بات چیت کرتے ہوئے انہوں نے کہاکہ پانچوں حلقوں میں کانگریس جے ڈی ایس اتحاد کو کامیابی ملنے کا انہیں پورا یقین ہے، ضمنی انتخابات میں بی جے پی کو منہ کی کھانی پڑے گی۔ انہوں نے کہاکہ حکمران اتحاد میں شامل دونوں پارٹیوں نے آپسی تبادلۂ خیال کے ذریعے حلقوں کی تقسیم کی ہے۔
انہوں نے کہا کہ شیموگہ پارلیمانی حلقے میں چونکہ کانگریس کی جیت فی الوقت ممکن نہیں ہے، اسی لئے حکمران اتحاد کو مضبوط کرنے کی حکمت عملی کے تحت یہ سیٹ جے ڈی ایس کے حق میں چھوڑ دی گئی ہے۔ بی جے پی کی طرف سے کانگریس کو کمزور قرار دیتے ہوئے لگائے جارہے الزامات پر ردعمل ظاہر کرتے ہوئے ڈاکٹر پرمیشور نے کہاکہ یڈیورپا جو چاہے کوشش کرلیں وہ کانگریسیوں کے حوصلوں اور ریاست میں کانگریس جے ڈی ایس کی دوستی کو توڑنے میں کبھی کامیاب نہیں ہوں گے۔ انہوں نے کہاکہ ضمنی انتخابات کے لئے حلقوں کی تقسیم اور امیدواروں کے انتخاب کے معاملے میں کانگریس اور جے ڈی ایس میں کسی بھی طرح کا کوئی اختلاف نہیں ہے۔
بلاری لوک سبھا حلقے میں مقامی قائدین اور اراکین اسمبلی سے مشوروں کے بعد ہی کانگریس نے وی ایس اگرپا کو میدان میں اتارنے کا فیصلہ کیا ، انہیں میدان میں اتارنے سے پارٹی میں کسی طرح کا انتشار نہیں ہے۔ میڈیا کے بعض حلقوں میں ان خبروں پر کہ بلاری میں امیدوار کے انتخاب کو لے کر پارٹی میں انتشار پایا جاتا ہے، ڈاکٹر پرمیشور نے ان خبروں کو جھوٹ کا پلندہ قرار دیا۔ انہوں نے کہاکہ ضمنی انتخابات میں امیدواروں کے حق میں انتخابی مہم کے لئے کانگریس اور جے ڈی ایس قائدین ایک ساتھ میدان میں رہیں گے اور یہ یقینی بنائیں گے کہ اتحاد کے تمام امیدوار اپنے اپنے حلقوں میں کامیابی حاصل کرلیں۔
میسور دسہرہ تقریبات میں کانگریس قائدین کو مدعو نہ کئے جانے پر میسور کے اراکین اسمبلی کے بیان پر تبصرہ کرتے ہوئے پرمیشور نے کہا کہ اس بیان کا انہوں نے جائزہ لیا ہے اور اس سلسلے میں وہ ضلع انچارج وزیر سے بھی تبادلۂ خیال کرچکے ہیں۔ ممکن ہے کہ رابطے کی کمی کے سبب ایسا ہوا ہوگا ، آئندہ ایسا ہونے نہ پائے اس کی ہدایت دینے کے بعد ضلع انچارج وزیر نے یقین دلایا ہے کہ آئندہ کسی طرح کی لاپروائی نہیں ہوگی۔ انہوں نے کہاکہ میسور دسہرہ تقریبات کے لئے اس بار بھی ریاستی حکومت کی طرف سے کوئی سب کمیٹی ترتیب نہیں دی گئی ۔ اسی لئے یہ بیان غلط ہے کہ کانگریس کے بجز دیگر پارٹیوں کے اراکین پر مشتمل ایک کمیٹی قائم کردی گئی ہے۔ اس موقع پر نائب وزیراعلیٰ نے کہا کہ پہلی بار بحیثیت نائب وزیراعلیٰ وہ دسہرہ تقریبات میں شرکت کررہے ہیں۔