بھوپال:6/دسمبر (ایس او نیوز/آئی این ایس انڈیا) کانگریس مدھیہ پردیش کے صدر کمل ناتھ نے آج کہاہے کہ پارٹی نے کرناٹک اور گجرات کی غلطیوں سے سبق لیا ہے اورپارٹی کی جھولی میں مدھیہ پردیش کی 140 سے زائد سیٹیں آ رہی ہیں۔ آج یہاں صحافیوں سے گفتگو کے دوران مسٹر کمل ناتھ نے کہا کہ انہوں نے ریاست میں ایک ایک حلقے کا مطالعہ کیا ہے۔ کانگریس کے حصے میں 140 سے زائد سیٹیں آ رہی ہیں۔ گجرات اور کرناٹک میں پارٹی سے جو غلطیاں ہوئیں، ان سے سبق لیا گیا ہے۔انہوں نے بر سر اقتدار پارٹی بی جے پی پرالیکشن میں پیسے کی طاقت کا غلط استعمال کا الزام لگاتے ہوئے کہا کہ بی جے پی کو پیسے بانٹنے سے کچھ نہیں ملے گا۔ انہوں نے کہا کہ ریاست کے عوام سمجھدار ہیں اور انہوں نے ریاست اور ترقی کے حق میں ووٹ دیا ہے۔انہوں نے مزید کہا کہ انتظامی مشینری کے نا جائز استعمال کی پوری کوشش ہوئی، لیکن انتظامی باڈی نے کسی طرح کی جانبداری نہیں کی، جس کے لیے وہ مبارکباد کے مستحق ہیں۔ ریاست میں تبدیلی پر زور دیتے ہوئے انہوں نے کہا کہ انگریزوں کے زمانے سے چلی آ ر ہے نظام کے تحت کئی عہدوں کے نام آج بھی وہی ہیں، جو اس وقت تھے۔ انہوں نے اس سلسلے میں کلیکٹر کی مثال دیتے ہوئے کہاہے کہ کلیکٹ کرنے والے کو یہ نام دیا گیا۔ اب اس فکر میں تبدیلی کی ضرورت ہے۔ انہوں نیکہاکہ نام میں نہ سہی پوسٹ میں تبدیلی کی ضرورت ہے۔