نئی دہلی، 23/فروری(ایس او نیوز/آئی این ایس انڈیا)کانگریس نے ممبئی میونسپل کارپوریشن (بی ایم سی)کے انتخابات کے نتائج کے بعد کہا ہے کہ وہ ایک ذمہ دار اپوزیشن کا کردار نبھائے گی۔کانگریس کے چیف ترجمان رندیپ سرجیوالا نے کہاکہ بی ایم سی انتخابات میں عوام کے فیصلے کی ہم سر جھکا کر عزت کرتے ہیں اور زمین پر کام کریں گے۔انہوں نے کہا کہ پارٹی جائزہ لے گی کہ کیوں کانگریس کارکنوں اور لیڈران ممبئی والوں کا دل نہیں جیت پائے۔واضح رہے کہ بی ایم سی میں گزشتہ 20سالوں سے شیوسینا اور بی جے پی اقتدار میں ہے، لیکن ایک بات تو واضح ہے ممبئی سڑکوں پر گڑھے، پانی اور گٹر وغیرہ جیسی بدانتظامی کا جو حال ہے،انتخابات کے نتائج کے بعد بھی ان میں سے کچھ تبدیلی نہیں آئے گی، اس لیے کانگریس اپوزیشن میں بیٹھ کر جائزہ لے گی کہ ممبئی کے مسائل کو اور پرزور طریقے سے اٹھائیں۔اس سے پہلے کانگریس لیڈر ملند دیوڑا نے ٹوئٹ کرکے کہاکہ ممبئی ملیریا اور واٹر ٹینکروں سے خوش ہیں، وہیں اس شکست کے بعد کانگریس کی ممبئی یونٹ کے صدر سنجے نرپم نے استعفی دے دیاہے، فی الحال کانگریس ہائی کمان کی طرف سے ان کے استعفی پر کوئی فیصلہ نہیں آیا ہے۔