کانگریس کے ساتھ اتحاد کے سوال پرکیجریوال نے کہا ،انہوں نے تقریباََانکار کر دیا
نئی دہلی ،14فروری(ایس او نیوز؍آئی این ایس انڈیا)عام آدمی پارٹی کے کنوینراوردہلی کے وزیراعلیٰ اروندکیجریوال نے کہا کہ دہلی میں اتحاد کو لے کر کانگریس نے تقریباََانکار کردیا۔ ان کا یہ بیان اپوزیشن جماعتوں کے ساتھ ملاقات کے بعد آیا ہے۔اس اجلاس میں کانگریس صدر راہل گاندھی بھیشامل تھے۔
کیجریوال نے جمعرات کو میڈیا سے بات کرتے ہوئے کہاکہ ہمارے ذہن میں ملک کو لے کر بہت زیادہ فکر ہے۔اسی وجہ سے ہم بیتاب ہیں۔کانگریس نے تقریبا انکار کر دیا۔بتا دیں آئندہ لوک سبھا انتخابات کے لئے اپوزیشن کی حکمت عملی کے لئے این سی پی لیڈر شرد پوار کے گھر ہوئی میٹنگ میں اروند کیجریوال شامل تھے۔اس اجلاس میں مغربی بنگال کی وزیر اعلی ممتا بنرجی اور کانگریس صدر راہل گاندھی بھی تھے۔اجلاس کے بعد راہل گاندھی کے بیان سے اشارہ ملا ہے کہ مغربی بنگال اور دہلی میں کانگریس اکیلے الیکشن لڑے گی۔مغربی بنگال میں ممتا بنرجی کی ٹی ایم سی اور دہلی میں اروند کیجریوال کی عام آدمی پارٹی کی حکومت ہے۔
راہل گاندھی نے کہا تھاکہ ایک دوسرے کے خلاف بھی الیکشن لڑیں گے۔ممتا بنرجی نے اعلان کیا تھا کہ نریندر مودی کے خلاف اپوزیشن پارٹی انتخابات سے پہلے اتحاد کریں گے۔تاہم بنگال اور دہلی میں اتحاد کے سوال پر انہوں نے کہاکہ یہ ابھی طے نہیں ہوا ہے۔ بتا دیں شرد پوار کی رہائش گاہ پر اپوزیشن پارٹیوں کی ہوئی میٹنگ میں طے کیا گیا کہ انتخابات کے پہلے اتحاد کیا جائے گا۔اجلاس میں کم از کم مشترکہ پروگرام پر بھی بات ہوئی۔