بنگلورو،5؍اکتوبر(ایس او نیوز) وزیر اعلیٰ ایچ ڈی کمار سوامی نے کہا ہے کہ مرکزی حکومت کی طرف سے شہریان بنگلور اور آس پاس کے علاقوں میں آباد لوگوں کو پینے کے پانی کی فراہمی کے لئے میکے داٹ آبی منصوبے کی شروعات کو کسی بھی وقت مرکزی حکومت کی طرف سے منظوری مل سکتی ہے۔

مرکزی وزیر برائے آبی وسائل نتن گڈکری سے ملاقات کے بعد دہلی میں اخباری کانفرنس سے خطاب کرتے ہوئے کمار سوامی نے کہاکہ میکے داٹ منصوبہ جس مقصد کے لئے تعمیر کیاجارہاہے اس سلسلے میں تمام تفصیلات مرکزی حکومت کو پیش کردی گئی ہیں۔ انہوں نے کہاکہ مرکزی وزیر نے اس منصوبے پر مثبت موقف کا مظاہرہ کیا ہے، اور انہیں یقین ہے کہ اس وزارت سے انہیں منظوری جلد مل جائے گی، اس کے بعد وزارت ماحولیات وجنگلات سے بھی اس پراجکٹ کے لئے باضابطہ منظوری کے لئے کارروائی کی گئی ہے۔

انہوں نے کہا کہ مرکزی حکومت پر یہ واضح کردیاگیا ہے کہ میکے داٹ پراجکٹ بنگلور، رام نگرم، کنکاپورہ اور آس پاس کے علاقوں میں بسی آبادی کو صرف پینے کے پانی کے فراہمی تک محدود ہے، اس پراجکٹ کو کسی اور مقصد کے لئے استعمال میں نہیں لایا جائے گا۔ اس موقع پر وزیر اعلیٰ نے مسٹر گڈکری سے جو قومی شاہراہوں کے بھی وزیر ہیں ریاست میں شاہراہوں کی ترقی کے بارے میں تبادلۂ خیال کیا۔

ریاست کی مختلف شاہراہوں کو ترقی دینے کے لئے فی الوقت جو کام جاری ہیں ان کو تیزی سے مکمل کرنے اور جن منصوبوں پر کام شروع نہیں ہوا ہے ان پر کام جلد شروع کرنے کے لئے زور دیاگیا۔ چکمگلور ، بلیکیری ، باناوار، ہلیال روڈ کو ترقی دینے کے لئے جو منصوبہ تیار کیا گیا ہے، وزیر اعلیٰ کمار سوامی نے اس کا سنگ بنیاد رکھنے گڈکری کو مدعو کیا۔ اس موقع پر ریاستی وزیر برائے تعمیرات عامہ ایچ ڈی ریونا نے شاہراہوں پر محکمۂ تعمیرات عامہ کی طرف سے تعمیر کی جانے والی سہولتوں کو بہتر طریقے سے استعمال کرنے اور ان کی تعمیر کرنے کے لئے وزارت قومی شاہراہ کی طرف سے مناسب تعاون کے سلسلے میں بھی تبادلۂ خیال کیا۔

بنگلور اور منگلور کو جوڑنے والی شاہراہ نمبر 275 کے درمیان آنے والے گھاٹ سیکشن اور قومی شاہراہ نمبر 75 پر آنے والے شراڈی گھاٹ ، قومی شاہراہ نمبر 234 پر آنے والے چارمری گھاٹ ، قومی شاہراہ نمبر 169 پر آنے والے اگمبے گھاٹ اور دیگر شاہراہوں پر حالیہ بارشوں کے سبب جابجا زمین کھسکنے کے واقعات سے مرکزی وزیر کو ریونا نے آگاہ کرایا اور کہاکہ ان تمام شاہراہوں کی مرمت کے لئے 2078 کروڑ روپیوں کی رقم درکار ہے۔فوری طور پر مرکزی حکومت 1328کروڑ روپے منظورکرے۔