پٹنہ ؍آرا، 20فروری(ایس اونیوز/آئی این ایس انڈیا)بھارتیہ جنتا پارٹی (بی جے پی)کے سینئر لیڈر اور راجیہ سبھا ممبر پارلیمنٹ روندر کشور سنہا کی اتوار کو انتخابی اجتماع کرنے جانے کے دوران اترپردیش کے بستی میں واقع روتا چوراہے پر سپائی غنڈوں کی طرف سے کئے گئے قاتلانہ حملے اور ٹرینوں پر کئے گئے پتھراؤ کے واقعہ کا زبردست ردعمل ہوا ہے،اس لئے لوگو میں بھاری غصہ ہے،واقعہ کی چوطرفہ مذمت ہو رہی ہے۔بہار بی جے پی کے تمام بڑے لیڈروں سمیت یوتھ مورچہ کے ریاستی لیڈر سنجیو کمار سنگھ، کنال سنگھ سولننکی، بھاجیمو لیڈر دیپک سنگھ، آرابار ایسوسی ایشن کے وجیتا وردھن، ایڈووکیٹ سندیپ کمار، نوجوان لیڈر بھیم لال، آشوتوش سہائے، پرکاش کمار، دھنوج سنگھ سمیت سینکڑوں لوگوں نے واقعہ کی مذمت کرتے ہوئے ان غنڈوں کو جلد سے جلد گرفتار کرنے کا مطالبہ کیا ہے۔بی جے پی لیڈروں نے کہا کہ آر کے سنہاملک کی تعمیر میں اپنا کردار ادا کر رہے ہیں،وہ معاشرے کے بین الاقوامی نمائندے تو ہیں ہی ساتھ ہی تمام ذات اور مذہب کے لیڈر ہیں۔عوام میں بڑے پیمانے پراپنی مقبولیت بنا چکے آر کے سنہا کی انتخابی جلسوں میں خلل ڈالنے کی کوشش کرنے والے لوگوں کی جگہ جیل میں ہونی چاہئے۔قابل ذکر ہے کہ اتوارکو بستی صدر کے علاقے میں انتخابی مہم کرنے جاتے وقت وہاں کا ایک آزاد امیدوار راکیش شریواستو اپنے قریب سو حامیوں کے ساتھ روتا چوراہا آکر گاڑی کو گھیر لیا اور ممبر پارلیمنٹ کو اجتماع سے واپس جانے اور گاڑی سے نیچے اترنے کی دھمکی دینے لگا۔جب ایم پی سنہا گاڑی سے نہیں اترے تو وہ گاڑی پر پتھراؤ کرنے لگے۔اس حادثے میں گاڑی کو نقصان پہنچا۔ایم پی کی حفاظت میں لگے سیکورٹی اہلکاروں نے غنڈوں کی جم کر پٹائی کر دی تب جاکر غنڈے بھاگ کھڑے ہوئے۔ادھر ایم پی سنہا نے پورے معاملے کو لے کر اپنی طرف سے ایف آئی آر درج کرائی ہے۔ملزموں کو گرفتار کرنے میں پولیس مصروف ہو گئی ہے۔ راکیش شریواستو سمیت تقریبا سو لوگوں کے خلاف مقدمہ درج کیا گیا ہے۔