بنگلورو،16؍جولائی(ایس او نیوز) ریاستی وزیر اعلیٰ ایچ ڈی کمار سوامی نے بلدی حکام کو یہ ہدایت دی ہے کہ بنگلور شہر کی ترقی کے لئے جاری کئے گئے منصوبوں اور تعمیراتی کاموں کو متعینہ وقت کے اندر مکمل کرنے کے ذریعہ عوام کو سہولت فراہم کی جائے۔

وزیر اعلیٰ نے بنگلورو شہر کی ترقی اور شہر کو در پیش ٹریفک کا مسئلہ، راستوں کی خستہ حالی، کچرے کی نکاسی، تالابوں کا تحفظ، میٹرو کے تعمیراتی کام کی پیش رفت اور دیگر امور سے متعلق بیو کام کی صدر کرن مذمدارشاہ اور بی پیاک نامی عوامی رضاکار تنظیم کے ذمہ داروں کے ساتھ تبادلہ خیال کیا تھا۔

اس موقع پر کمار سوامی نے یقین دلایا کہ ہر ماہ نائب وزیر اعلیٰ اور اعلیٰ افسران کے ساتھ جائزہ اجلاس منعقد کرنے کے ذریعہ ترقیاتی کاموں یں تیزی پیدا کی جائے گی۔اس اجلاس میں چیف سکریٹری ٹی ایم وجے بھاسکر، محکمہ شہری ترقیات کے جائنٹ چیف سکریٹری مہیندر جین، بی ایم آر سی ایل کے منیجنگ ڈائرکٹر اجے سیٹھ، بی بی ایم پی کمشنر منجو ناتھ پرساد، بنگلور شہر کے پولیس کمشنر ٹی سنیل کمار، بی پیاک کے اراکین اور دیگر کئی اعلیٰ افسران موجود تھے۔