دوسری بیوی رادھیکا اور بیٹی کی معلومات الیکشن کمیشن میں جمع نہ کرنے پرکمار سوامی کے خلاف شکایت درج
بنگلورو،26؍مارچ (ایس او نیوز) وزیراعلیٰ ایچ ڈی کمار سوامی کے خلاف ریاستی پولیس مہاسنگھا کے صدر ششی دھرنے الیکشن کمیشن میں شکایت درج کروائی ہے۔ اپنی شکایت میں انہوں نے کہاکہ اسمبلی انتخابات کے موقع پرکمار سوامی نے اپنی ذاتی تفصیلات کے سلسلہ میں الیکشن کمیشن کو معلومات فراہم نہیں تھیں۔ اس ضمن میں صحیح طریقہ سے تحقیق وتفتیش کرنے کی ضرورت ہے۔ کمارسوامی نے اپنی ذاتی زندگی کے حوالے سے مکمل معلومات فراہم نہیں کیں۔ ان سے ایک اولاد کا جنم ہواہے۔ اس بچہ کے والد کمار سوامی ہیں لیکن 2018 کے اسمبلی انتخابات کے موقع پر کمار سوامی نے اس بچی کی معلومات الیکشن کمیشن میں نہیں دی۔ یہ عمل عوامی نمائندہ ایکٹ کے تحت غلط ہے۔ انہوں نے مزید کہاکہ عوامی نمائندہ ایکٹ 125(اے) اور فوجداری معاملہ کے تحت انتخابات میں حصہ لینے والے امیدوارکو چاہئے کہ وہ انحصارکرنے والے اپنے کنبہ کے تمام اراکین کا تفصیلی تعارف کروائے ۔ لیکن کمار سوامی نے اپنی دوسری بیوی رادھیکا کمار سوامی اور ان کی بیٹی کا ذکرنہیں کیا۔ اس طرح وزیراعلیٰ نے ریاست کے عوام کو غلط پیغام دیا ہے۔ رادھیکا کے ساتھ تعلقات جائز ہوں یا ناجائز ہرحال میں کمار سوامی کو الیکشن کمیشن میں جمع کردہ حلف نامہ میں درج کرناتھا لیکن انہوں نے ایسا نہیں کیا۔ الیکشن کمیشن کو چاہئے کہ وہ ان کے خلاف قانونی کارروائی کرے۔