بنگلورو،14؍نومبر(ایس اونیوز؍عبدالحلیم منصور) نجی اسپتالوں پر لگام کسنے کے سلسلے میں مجوزہ بل کا جائزہ لینے کیلئے قائم مشترکہ ایوان کمیٹی نے آج ایوان میں اپنی رپورٹ پیش کردی، تاہم کمیٹی نے اس بل کے متعلق اپنی کوئی سفارش پیش نہیں کی۔ اس قانون کے مطابق لاپرواہی کے مرتکب ڈاکٹروں کو سزائے قید دی جائے یا نہیں اس بارے میں بھی رپورٹ میں کوئی تذکرہ نہیں کیاگیا ہے۔ جس کے نتیجہ میں اس بل پر بحث کے بعد ہی اس کے خطوط وضع کرنے کا فیصلہ کیا جاسکتا ہے۔اس مشترکہ ایوان کمیٹی کے چیرمین کے این راجنا نے آج اسمبلی میں اپنی رپورٹ پیش کرتے ہوئے بتایاکہ اس بل کے بعض امور پر کمیٹی نے اپنی سفارشات ضرور پیش کی ہیں لیکن سزائے قید کے متعلق کوئی رائے پیش نہیں کی گئی۔ حکومت نے اس سے پہلے جو بنیادی بل پیش کیا تھا اس میں ڈاکٹروں کو سزائے قید کی تجویز کی گئی تھی۔ لیکن کمیٹی نے اپنی رپورٹ میں اس امر کا جائزہ نہیں لیا ہے۔ حکومت کی طرف سے جو ترمیمی بل لائی گئی ہے اس کی بنیاد پر ڈاکٹر ہڑتال پر ہیں اور مطالبہ کررہے ہیں کہ اس میں سزائے قید کے ضابطہ کو خارج کیا جائے۔ اسمبلی میں یہ بل کب پیش ہوگی اور اس پر بحث کب ہوگی تاریخ ابھی طے نہیں ہوئی ہے۔