یوم آزادی کے موقع پرجنوبی کینرا میں ضلع انچارج وزیریوٹی قادر نے کی پرچم کشائی
منگلورو15؍اگست (ایس او نیوز) یوم آزادی کے 72ویں جشن کے موقع پر جنوبی کینرا میں وزیر شہری ترقیات اور ضلع انچارج وزیر جناب یو ٹی قادر نے پرچم کشائی کی۔انہوں نے اس موقع پر خطاب کرتے ہوئے کہا کہ 1947میں آزادی حاصل کرنے کے بعدہمارے ملک نے مختلف میدانوں میں بہت زیادہ ترقی کی ہے اور آج دنیا کے طاقتور ترین ممالک میں اس کا شمار ہوتا ہے۔ساری دنیا یہاں کے انسانی وسائل اور نوجوانوں کی قوت کو محسوس کررہی ہے۔
انہو ں نے کرناٹکا حکومت کی طرف سے فراہم کی جارہی سہولتوں اور ترقیاتی منصوبوں کابھی تذکرہ کیا۔جنوبی کینرا ضلع کے تعلق سے یو ٹی قادر نے کہا کہ یہ ضلع تعلیمی میدان میں ترقی کے لئے جانا جاتا ہے۔ یہاں پر انڈین کوسٹل گارڈ کی نیشنل اکیڈیمی قائم کرنے کا منصوبہ زیرغور ہے۔اس کے علاوہ انٹرنیشنل ایئر پورٹ کی مزید توسیع اورترقی کا بھی منصوبہ ہے۔
وزیر موصوف نے کہا کہ :’’یوم آزادی سے ہمیں اتحاداورقومی ہم آہنگی کا سبق ملتا ہے۔ہمارے مجاہدین آزادی نے انگریزوں کے خلاف جنگ کرتے ہوئے انہیں یہاں سے نکال باہر کیاتھا۔ ہم لوگوں کو چاہیے کہ ان مجاہدین آزادی کو ہم اپنا رول ماڈل بنائیں اورآپس میں اتحاد و اتفاق کے ساتھ زندگی گزاریں۔ فرقہ وارانہ تقسیم ملک کے لئے ہمیشہ خطرناک ہوتی ہے۔اس لئے ہمیں اسے فروغ نہیں دینا چاہیے۔‘‘جناب یو ٹی قادر نے ضلع سطح پر ’’گرین کرناٹکا‘‘پروگرام کا آغازپودے لگاکر کیا۔
پولیس ، ہوم گارڈس، این سی سی، اسکاؤٹ اور اسکول و کالج کے طلباء نے پریڈ میں حصہ لیا۔اس موقع پر جنوبی کینرا کے ڈپٹی کمشنر سسی کانت سینتھل، رکن پارلیمان نلین کمار کٹیل،پولیس کمشنر ٹی آر سریش اور منگلورو کے بشپ ڈاکٹر ایلوئشیس پال ڈیسوزا موجود تھے۔