پتور17؍نومبر(ایس او نیوز) پرائیویٹ اسپتالوں اور ڈاکٹروں پر کنٹرول کرنے والے سرکار کے مجوزہ بل کے خلاف آئی ایم اے کے کرناٹکا چاپٹر کی آواز پر پرائیویٹ اسپتالوں کے ڈاکٹروں نے ہڑتال کا جو سلسلہ چلا رکھا ہے اس کی وجہ سے کئی جانیں تلف ہونے کی خبریں مل رہی ہیں۔

افسوسناک امر یہ ہے کہ اس ہڑتال کی وجہ سے بروقت طبی امداد نہ ملنے کی وجہ سے موت کا شکار ہونے والوں کی تعداد ریاست کے مختلف علاقوں سے ملنے والی رپورٹوں کے ساتھ دن بدن بڑھتی جارہی ہے۔ ہڑتال کا تازہ شکارجنوبی کینرا ضلع کی ایک طالبہ ہوئی ہے جس کی شناخت پوجا کے طور پر کی گئی ہے۔پوجا سیکنڈایئر بی کام کی طالبہ تھی اوراس کے گردے ناکام ہوجانے سے پتور کے ایک پرائیویٹ اسپتال میں اس کا علاج ڈایالیسس سے کیا جاتا تھا۔ لیکن جمعہ کے دن جب پوجا کی حالت بگڑنے پر اسے فوری طور پر اسپتال لے جایا گیا تو ڈاکٹرز ہڑتال پر ہونے کی وجہ سے وہاں اس کا علاج نہیں کیا جاسکا۔ اسپتا ل والوں نے اسے منگلورو لے جانے کا مشورہ دیا، لیکن اس نے منگلورو پہنچنے سے پہلے ایمبولینس میں ہی دم توڑ دیا۔