مخلوط حکومت کے متعلق بیان بازی سڑکوں پر نہ کی جائے: دیوے گوڈا
بنگلورو 9جنوری (ایس او نیوز) سابق وزیراعظم اور جے ڈی ایس کے قومی سربراہ ایچ ڈی دیوے گوڈا نے ریاستی مخلوط حکومت میں شامل کانگریس جے ڈی ایس دونوں پارٹیوں کے لیڈروں کو نصیحت کی ہے کہ حکومت میں کسی بھی اختلاف کے متعلق بیان بازی سڑکوں پر نہ کی جائے۔
پچھلے دنوں سرکاری بورڈز اور کارپوریشنوں کے تقرر کے متعلق وزیربرائے تعمیرات عامہ ایچ ڈی ریونا اور سابق وزیر ایچ ایم ریونا کے درمیان ہوئی سیاسی نوک جھونک پر اپنا سخت ردعمل ظاہر کرتے ہوئے سابق وزیراعظم نے کہاکہ دونوں پارٹیوں کے لیڈر مخلوط حکومت میں کسی بھی مسئلے کی صورت میں اس سے اپنی اپنی پارٹی کے رہنماؤں کو آگاہ کرائیں، جے ڈی ایس قائدین اپنی شکایت ان تک یا وزیراعلیٰ کمار سوامی تک پہنچائیں اور کانگریس قائدین رابطہ کمیٹی کے چیرمین سدرامیا ، نائب وزیر اعلیٰ پرمیشور اور کے پی سی سی صدر سے رجوع ہوں۔ ایسا کرنے کی بجائے اگر مخلوط حکومت کے بارے میں بیان بازی فٹ پاتھوں پرکھڑے ہوکر کی گئی تو اس سے حکومت کی ساکھ متاثر ہوگی۔ اور اپوزیشن پارٹیوں کو حکومت کے خلاف بیان بازی کا موقع ملے گا۔ وہ نہیں چاہتے کہ مخلوط حکومت کسی طرح کے انتشار کا شکار ہو، کرناٹک میں کانگریس اور جے ڈی ایس نے سیکولر قوتوں کو متحد کرنے کا جو کامیاب تجربہ کیا ہے اس سے استفادہ پورے ملک کی سیاسی پارٹیاں اٹھانے کی کوشش کررہی ہیں۔ قومی سطح پر فرقہ پرست طاقتوں کو آگے بڑھنے سے روکنے کے لئے کرناٹک کی پہل کو کامیاب ترین مانا جارہا ہے۔ ان حالات میں دونوں پارٹیوں کی کوشش یہی ہونی چاہئے کہ اس پہل سے استفادہ کرتے ہوئے کرناٹک میں فرقہ پرست جماعت کو محدود کیاجائے۔ اور آنے والے لوک سبھا انتخابات میں کانگریس جے ڈی ایس اتحاد اتنی سیٹوں پر کامیابی ضرور حاصل کرے کہ اس کی بدولت بی جے پی کو اقتدارپر آنے سے روکا جاسکے۔