نئی دہلی ،04؍دسمبر ( ایس او نیوز؍آئی این ایس انڈیا) سپریم کورٹ نے کوئلے کی کان کنی الاٹمنٹ کیس میں سی بی آئی کے سابق ڈائریکٹر رنجیت سنہا کے خلاف تحقیقات کیلئے متعین خصوصی تفتیشی ٹیم کو چار ہفتوں کے اندررپورٹ پیش کرنے کی ہدایت دی۔جسٹس مدن بی لوکور، جسٹس کورین جوزف اور جسٹس اے کے سیکری کی تین رکنی بینچ نے تفتیشی ٹیم سے کہا کہ اس معاملے میں اب تک کی تحقیقات کے بارے میں یہ رپورٹ سیل بند لفافے میں پیش کی جائے۔عدالت کے اس ہدایات سے پہلے، وکیل پرشانت بھوشن نے کہا کہ خصوصی تفتیشی ٹیم کی تشکیل کے بعد سے کئی ماہ گزر چکا ہے اور اب اسے اپنی تحقیقات کی پیش رفت رپورٹ پیش کرنے کیلئے کہا جانا چاہئے۔عدالت عظمی نے 23 جنوری کو سی بی آئی کے ڈائریکٹر کی سربراہی میں خصوصی تفتیشی ٹیم قائم کیا تھا جسے کوئلہ گھوٹالے کی جانچ کو متاثر کرنے کے اپنے سابق سربراہ پر لگے الزامات کی ابتدائی تحقیقات کرنے کی ہدایت دی گئی تھی۔اس پر بنچ نے تفتیشی بیورو کے ڈائریکٹر کو ان مقدمات کی تحقیقات 15 جنوری، 2018 تک مکمل کرنے کی ہدایت دی۔