بنگلورو، 7؍مارچ(ایس او نیوز) وزیر اعلیٰ سدرامیا نے یہ بات دہرائی کہ آنے والے اسمبلی انتخابات وہ چامنڈیشوری اسمبلی حلقے سے ہی لڑیں گے۔ آج میسور میں اپنی رہائش گاہ پر اخباری نمائندوں سے بات چیت کرتے ہوئے سدرامیا نے کہاکہ سیاسی میدان میں انہوں نے قدم چامنڈیشوری حلقے سے ہی رکھا تھا اب اسی حلقے سے وہ اپنا آخری اسمبلی چناؤ بھی لڑیں گے۔ چامنڈیشوری حلقے نے انہیں سیاسی میدان میں آگے بڑھنے کا جو موقع فراہم کیا ہے اسے وہ کبھی فراموش نہیں کرسکتے۔ سابق وزیراعلیٰ ایچ ڈی کمار سوامی اور بی ایس یڈیورپا کے درمیان انہیں ہرانے کے لئے جاری مفاہمت پر تبصرہ کرتے ہوئے سدرامیا نے کہاکہ یہ دونوں ہر طرح کے حربے آزمانے کی کوشش کررہے ہیں لیکن یہ کامیاب نہیں ہوں گے۔ انہوں نے کہاکہ چامنڈیشوری اسمبلی حلقے میں 2006کے دوران بھی انہیں ہرانے کی بہت کوشش کی گئی لیکن یہاں کے عوام نے ان کا ساتھ نہیں چھوڑا۔ انہوں نے کہاکہ کسی بھی حال میں جنتادل (ایس) چامنڈیشوری حلقے سے کامیاب ہوہی نہیں سکتی۔ کمار سوامی اور یڈیورپا کے ایک ہوجانے کے متعلق انہوں نے کہاکہ ان دونوں کے ایک ہوجانے سے جنتادل (ایس) کوفائدہ نہیں بلکہ نقصان ہوگا اور عوام پر یہ ظاہر ہوجائے گا کہ یہ دونوں پارٹیاں انتخابات کے بعد بھی ایسی ہی موقع پرستی کرسکتی ہیں۔ سابق وزیر ایچ وشواناتھ اور وی سرینواس پرساد کے جنتادل (ایس) اور بی جے پی میں شامل ہونے کے متعلق انہوں نے کہاکہ کانگریس سے سیاسی فائدہ اٹھانے کے بعد یہ دونوں پارٹی کے ساتھ دغا کرکے دوسری پارٹیوں میں جاچکے ہیں ، ان دونوں کے چلے جانے سے کانگریس کو کوئی نقصان نہیں ہوا۔ سدرامیا نے کہاکہ چامنڈیشوری حلقے میں انہیں کسی لیڈر پر نہیں بلکہ ووٹروں پر پورا بھروسہ ہے۔