حکومت پر سی ایم ابراہیم کی نکتہ چینی پر وزیر اعلیٰ کا جواب،بے چین روحوں کو مطمئن کرنا مشکل: سدرامیا
بنگلورو،22؍اکتوبر(ایس او نیوز) وزیر اعلیٰ سدرامیا نے سابق مرکزی وزیر سی ایم ابراہیم کی طرف سے ریاستی حکومت کی کارکردگی پر اظہار عدم اطمینان پر تبصرہ کرتے ہوئے کہاکہ اقتدار پر رہتے ہوئے ہر ایک کو مطمئن نہیں کیا جاسکتا۔ حکومت کی کارکردگی کے متعلق عدم اطمینان ظاہر کئے جانے پر اپنا غصہ ظاہر کرتے ہوئے وزیراعلیٰ نے کہاکہ بے چین روحوں کو مطمئن کبھی نہیں کیاجاسکتا۔ ان لوگوں کو ہمیشہ بے چینی رہتی ہے۔ان کی حکومت پرعدم اطمینان کا اظہار اسی بے چینی کا حصہ ہوسکتا ہے۔میسور میں اپنی رہائش گاہ پر اخباری نمائندوں سے بات چیت کرتے ہوئے وزیر اعلیٰ سدرامیا نے اپنے رفیق خاص سی ایم ابراہیم پر راست نکتہ چینی کی اور کہاکہ پچھلے دو سال سے ریاست میں خشک سالی برقرار ہے، کسان طبقہ فصلوں کے ناکام ہوجانے سے بدحال ہے۔ حکومت اس صورتحال سے نمٹنے کیلئے کئی قدم اٹھارہی ہے، عنقریب وزیر مالگذاری کاگوڈتمپا اس سلسلے میں مرکزی حکومت سے نمائندگی کرنے والے ہیں انہوں نے کہاکہ مرکزی حکومت سے گذارش کی جائے گی کہ خشک سالی سے نمٹنے کیلئے کرناٹک کو زیادہ فنڈز مہیا کرائے جائیں۔ پولیس ملازمین کی تنخواہوں میں اضافہ کے متعلق ایک سوال پر سدرامیا نے کہا کہ اڈیشنل ڈی جی پی راگھویندرا اورادکر کی کمیٹی نے تمام مسائل کا جائزہ لے کر حکومت کو ایک رپورٹ پیش کی ہے، حکومت اس کا جائزہ لے کر تنخواہوں پر نظر ثانی کرے گی۔