بنگلورو،30؍ جولائی (ایس او  نیوز) کانگریس ۔ جے ڈی ایس قیادت والی مخلوط حکومت کی ناکامیوں کے خلاف احتجاج کرنے کیلئے اپوزیشن بی جے پی نے تاریخ مقرر کردی ہے ۔ 9 اگست سے 3 ٹیمیں ریاست بھر کا دورہ کریں گی جبکہ بی جے پی کے ریاستی صدر بی ایس ایڈی یورپا کی قیادت والی ٹیم شمالی کرناٹک کے 13 اضلاع کا دورہ کرے گی۔

ایڈی یورپا کی ٹیم میں رکن پارلیمان شوبھا کرندلاجے اوراسمبلی میں اپوزیشن کے ڈپٹی لیڈر گووند کارجول شامل رہیں گے ۔ اسی طرح سابق وزیر اعلیٰ جگدیش شٹر کی قیادت میں سابق نائب وزیر اعلیٰ آر اشوک، سابق وزیر اروند لمباولی پر مشتمل دوسری ٹیم ہوگی ۔ سابق نائب وزیر اعلیٰ کے ایس ایشورپا کی قیادت میں تیسری ٹیم تیار کی گئی ہے جس میں رعیت مورچہ کے صدر لکشمن سودی اور سابق وزیر سی ٹی روی ہوں گے ۔ بی جے پی کے ریاستی صدر بی ایس ایڈی یورپا نے یہ بات بتائی ۔ گزشتہ روز بی جے پی لیڈروں کے ریاست گیر دورہ کے متعلق میڈیا کو تفصیل فراہم کرتے ہوئے انہوں نے بتایا کہ شہر میں منعقدہ کور کمیٹی میٹنگ اور پارٹی کے جنرل سکریٹریوں کی میٹنگ میں یہ فیصلہ کیا گیا ۔ انہوں نے بتایا کہ 9 اگست انقلاب کا دن ہے اس لئے اسی دن سے ریاستی حکومت کے خلاف احتجاج شروع ہوگا۔

اس موقع پر شمالی کرناٹک ۔ جنوبی کرناٹک میں پائے جانے والے فرق اور ریاستی حکومت کی ناکامیوں کے متعلق عوام کو آگاہ کرایا جائے گا ۔ ایڈی یورپا نے ریاستی حکومت پر برہمی ظاہر کرتے ہوئے کہا کہ حکومت بدعنوانیوں میں ڈوبی ہوئی ہے ۔ اندراکینٹین میں بدعنوانی ہوئی ہے، انیلا بھاگیہ منصوبہ کیلئے اسٹو کی خریدی میں گھپلہ ہوا ہے ۔ اسی طرح طلباء کی کتابیں ، یونیفارم کی خریدی میں رقم کا غلط استعمال ہوا ہے۔ انہوں نے بتایا کہ ودھان سودھا میں عوام کے ساتھ ساتھ صحافیوں کے داخلے پر جو پابندی لگانے کا فیصلہ کیا ہے وہ سراسر غلط ہے ۔