سدرامیا کی وزیر داخلہ راجناتھ سنگھ سے ملاقات،خشک سالی سے نمٹنے 4703کروڑ کی امداد کا مطالبہ
بنگلورو۔9/دسمبر(ایس او نیوز) ریاست میں خشک سالی سے متاثرہ علاقوں میں راحت کاری سے نمٹنے کیلئے آج وزیراعلیٰ سدرامیا نے مرکزی حکومت سے 4703کروڑ روپیوں کی فوری امداد کا مطالبہ کیا۔آج دہلی میں سدرامیا نے مرکزی وزیر داخلہ راجناتھ سنگھ سے ریاست کے کل جماعتی وفد کے ہمراہ ان کی رہائش گاہ پر ملاقات کی اور کرناٹک کی طرف سے اس سلسلے میں ایک اپیل پیش کی۔ انہوں نے مطالبہ کیا کہ اس کے علاوہ 967.76 کروڑ روپیوں کی رقم خصوصی گرانٹ کے طور پر کرناٹک کو جاری کی جائے،تاکہ خشک سالی کی صورتحال سے نمٹنے کیلئے حکومت کی طرف سے جاری اقدامات کو اور تیزی سے پورا کیاجاسکے۔ وزیر قانون وپارلیمانی امور ٹی بی جئے چندرااور دہلی میں نمائندہ برائے کرناٹک اپاجی ناڈگوڈا بھی وزیراعلیٰ کے ہمراہ موجود تھے۔وزیر اعلیٰ نے مرکزی وزیر داخلہ کو بتایاکہ خشک سالی کے سبب 17193 کروڑ روپیوں کا نقصان ہوا ہے۔ ریاستی حکومت نے خشک سالی کے متاثرین کی امداد کا کام کافی تیزی سے شروع کردیا ہے۔ پینے کے پانی کی فراہمی، جانوروں کیلئے چارہ،مزدوروں کیلئے روزگار فراہم کرنے کے معاملے میں کسی طرح کی دشواری پیش نہ آئے اس کیلئے مرکزی حکومت فوراً امداد جاری کرے۔وزیر اعلیٰ نے بتایاکہ ریاست کے 139 تعلقہ جات خشک سالی سے متاثر ہیں۔ یہاں پر محکمہئ دیہی ترقیات نے راحت کاری کیلئے اب تک 204کروڑ روپے صرف کردئے ہیں۔