بنگلورو،30؍مئی (ایس او نیوز) وزیر اعلیٰ ایچ ڈی کمارا سوامی نے جنوبی کینرا اور ساحلی علاقے میں مانسون کی ابتدائی بارش کے دوران عام زندگی جو متاثر ہوئی ہے ا س صورتحال کا جائزہ لینے کے لئے ضلع انتظامیہ سے تمام تفصیلات حاصل کیں اور متاثرین کو فوری طور پر راحت پہنچانے اور بنیادی سہولتیں فراہم کرنے کی ہدایات جاری کردی ہیں۔

وزیر اعلیٰ نے اپنے اخباری بیان میں بتایا کہ عوام کو جانی ومالی نقصان سے بچانے کی تدابیر کرنے اور خطرے کے مقامات سے لوگوں کو محفوظ مقامات تک منتقل کرنے کی ہدایت ضلع انتظامیہ کو دی گئی ہے۔ اس کے علاوہ اعلیٰ سرکاری حکام ضلع انتظامیہ کے ساتھ مسلسل رابطہ میں رہتے ہوئے حالات کی نگرانی کررہے ہیں۔اس ضمن میں ریاستی سرکار کی طرف سے جو بھی ریلیف اور امداد کی ضرورت ہوگی وہ ضلع انتظامیہ کو مہیا کردی جائے گی۔بارش کی وجہ سے تباہ ہونی سڑکوں کو درست کرنے، ٹوٹ کر گرنے والے بجلی کے کھمبوں کو ٹھیک کرکے بجلی بحال کرنے کے کام کو فوقیت دی جائے گی۔ اس کے علاوہ بڑے پیمانے پرسمندری کٹاؤ کے امکانات کو نظر میں رکھتے ہوئے مناسب تدابیر اختیار کی جائیں گی۔ضرورت پڑنے پر اسکولوں اور کالجوں کی چھٹیاں بڑھا دی جائیں گی۔

وزیر اعلیٰ نے بتایا کہ فی الحال منگلورو اور اڈپی ضلع کے لئے نیشنل ڈسیاسٹر ریلیف فورس(این ڈی آر ایف) کی ٹکڑیاں روانہ کردی گئی ہیں۔قدرتی آفت کے اس موقع پر ریاستی سرکار عوام کے ساتھ ہے اور ان کے لئے راحت رسانی کا انتظام کرنے کے سلسلے میں پوری طرح سرگرم ہے۔عوام کو بھی چاہیے کہ وہ اس وقت حکومت کے ساتھ بھر پور تعاون کریں۔