بنگلورو:4؍جون(ایس او  نیوز)وزیراعلیٰ سدارامیا نے کہاکہ ریاست میں بہت زیادہ قحط سالی کے باوجود کسانوں کے قرضہ جات کو معاف کرنے کے معاملہ میں مزید چند دنوں تک مرکزی حکومت کے فیصلہ کا انتظار کرنے کے بعد مناسب وقت پر کھرا اور دوٹوک فیصلہ لیں گے۔ میسور میں اپنی رہائش گاہ میں اخباری نمائندوں سے بات کرتے ہوئے وزیراعلیٰ نے کہاکہ سابق وزیراعلیٰ بی ایس ایڈی یورپا کی دھمکیوں سے وہ کبھی بھی ڈرنے والے نہیں ہیں۔ انہیں کسانوں سے بہت زیادہ ہمدردی ہے۔ کیوں کہ وہ خود کسانوں کے خاندان سے ہیں۔ انہوں نے بتایاہ اگر مرکزی حکومت کسانوں کے قومیائی گئی بینکوں کے قرضہ جات کو معاف کردے تو وہ بھی فوری کوآپریٹیو سوسائٹیز سے حاصل شدہ کسانوں کے قرضہ جات معاف کرنے کے لئے تیار ہیں۔ اس بات کوکئی مرتبہ دہراچکے ہیں۔ انہوں نے کہاکہ اگر مرکزی حکومت کوئی فیصلہ لینے میں ناکام رہی تو وہ مناسب وقت پر اہم فیصلہ لیں گے۔ وزیراعلیٰ نے کہاکہ ایڈی یورپا کی بے بنیاد اور بے جان دھمکیوں سے وہ ڈرنے والے نہیں ہیں۔ انہوں نے کہاکہ ایڈی یورپا کسانوں کے قرضہ جات کو معاف کرنے کے لئے دباؤ ڈالنے لگے ہیں۔ ان کے دور اقتدار میں انہوں نے کس طر ح کا فیصلہ لیا تھا اس سے وہ اچھی طرح واقف ہیں۔ انہوں نے بتایاکہ ایڈی یورپا کسانوں کو ان کے پاس لاکر ان کی ناک پکڑ کر قرضہ جات معاف کروانے کی باتیں کرنے لگے ہیں۔ اس طرح کا ناٹک کرنے اور معصوم کسانوں کو گمراہ کرنے سے ایڈی یورپا کو باز آنا چاہئے۔ انہوں نے کہاکہ ایڈی یورپا کی اس سیاسی چال سے ہر کوئی واقف ہے۔ سدارامیا نے کہاکہ ریاستی حکومت نے کسانوں کو صرف 22؍فیصد قرضہ جات جاری کئے ہیں۔ جبکہ مرکزی حکومت کی حصہ داری 78؍فیصد ہے۔ اگر ریاستی حکومت کسانوں کا قرضہ معاف کرے تو چند افراد کو اس سے فائدہ پہنچتاہے۔ اس لئے مرکزی حکومت کو چاہئے کہ وہ سب سے پہلے کسانوں کا قرضہ معاف کرنے کا اقدام کرے۔ اس کے لئے ایڈی یورپا اب تک مرکزی حکومت پر دباؤ ڈالنے میں ناکام ہی رہے ہیں۔