بنگلورو،22؍نومبر(ایس او نیوز) ریاست بھر میں سڑکوں پر چھوٹی موٹی تجارت کرنے والے53 ہزار سے زائد تاجروں کو مالی امداد دینے کی بڑاورا بندھو اسکیم کا آج وزیراعلیٰ ایچ ڈی کمارسوامی نے آغاز کیا۔
غریب تاجروں کو سود خوروں کی ہراسانی سے بچانے اور انہیں تجارت کے لئے قرضہ مہیا کرانے کے بہانے سے ان کے پاس سے زیادہ سود وصول کرنے والے عناصر پر روک لگانے کے مقصد سے ان تاجروں کو آسان قرضے فراہم کرنے کے لئے یہ اسکیم متعارف کروائی گئی ہے۔اس اسکیم کے نفاذ کا اعلان وزیر اعلیٰ ایچ ڈی کمارسوامی نے اپنی بجٹ تقریر میں کیاتھا۔
آج شہر کے اے پی ایم سی ترکاری مارکیٹ کے قریب منعقدہ تقریب میں کمار سوامی نے یہ اسکیم شروع کی۔ ساتھ ہی چھوٹے موٹے تاجروں کو بروقت قرضہ فراہم کرنے کے لئے موبائل وین کو ہری جھنڈی دکھائی۔ ریاست بھر میں فٹ پاتھوں اور سڑکوں پر تجارت کرنے والے 4.5لاکھ تاجروں کی نشاندہی کی گئی ہے۔ بی بی ایم پی کی حدود میں 80 ہزار ایسے تاجر ہیں جو فٹ پاتھوں پر تجارت کرتے ہیں۔ ریاست بھر کے بلدی اداروں کی طرف سے ان تاجروں کو شناختی کارڈ جاری کئے جارہے ہیں۔ شناختی کارڈوں کی فراہمی کے منصوبے کے تحت اب تک 1.8 لاکھ تاجر جو بنگلور کے باہر مصروف تجارت ہیں انہیں شناختی کارڈ جاری کردیاگیا ہے، جبکہ بی بی ایم پی کی حدود میں 24650 تاجروں کو شناختی کارڈ دیا گیا ہے۔ اس اسکیم کے تحت چھوٹے تاجروں کو ان کی تجارت کے لئے درکار قرضہ دو سے دس ہزار روپیوں تک بروقت مہیا کرایا جائے گا۔
بی بی ایم پی کی حدود میں فی الوقت قرضے کی زیادہ سے زیادہ حد پانچ ہزار روپے دیگر سٹی کارپوریشنوں کی حدود میں تین ہزار روپے اور قصبوں میں یہ قرضہ دو ہزار روپے تک طے کیا گیا ہے۔ فٹ پاتھوں پر تجارت کرنے والوں کے ساتھ ٹھیلہ گاڑیوں پر تجارت کرنے والے، کھانے پینے کی اشیاء سڑکوں پر فروخت کرنے والے، پھلوں اور ترکاریوں کے تاجروں ، کپڑے ، چپل فروخت کرنے والے ، چپل کی مرمت کرنے والے اور دیگر گھریلو ساز وسامان فروخت کرنے والوں کو یہ سہولت دی جائے گی۔ اس اسکیم کے تحت ایسے تاجروں کو قرضوں کی سہولت فراہم نہیں کی جائے گی جن کی تجارت کی وجہ سے سڑکوں پر گندگی پھیل رہی ہو، ہر تاجر پر یہ لازم قرار دیاگیا ہے کہ اپنے آس پاس کے ماحول کو پاک وصاف رکھے۔
تاجروں کو یہ قرضے شہر اوردیہاتوں کے کوآپریٹیو بینکوں کی طرف سے مہیا کرایا جائے گا۔ اور قرضوں کی فراہمی طے شدہ تعداد میں درخواستوں کی حد مقرر کرنے کے ذریعے دی جائے گی۔اس حد میں شامل تاجروں کی طرف سے قرضہ ادا کرنے کے بعد دوسرے تاجروں کو قرضہ جاری کیا جائے گا۔ قرضوں کے لئے رجسٹر شدہ تاجروں کو اپنا شناختی کارڈ فراہم کرنے کے ساتھ آدھار کارڈ، بی پی ایل کارڈ ، اس مقام کی تصویر جہاں پر وہ تجارت کرتے ہیں۔ اور زیرو بینلنس بینک اکاؤنٹ کی تفصیل فراہم کرنی ہوگی۔ قرضہ ادا کرنے کے لئے ہر تاجر کو تین ماہ کی مہلت دی جائے گی۔ ایک بار قرضے کی ادائیگی کے بعد اگلے قرضے میں دس فیصد اضافی رقم فراہم کی جائے گی ، آنے والے دنوں میں قرضوں کی حد کو 15ہزار تک بڑھانے کا منصوبہ ہے۔