بنگلورو،27؍جولائی(ایس او نیوز) شمالی کرناٹک کو نظر انداز کئے جانے کی شکایت پر وزیر اعلیٰ ایچ ڈی کمار سوامی نے جس طرح کا ردعمل ظاہر کیا ہے اس سے ریاست کے حکمران اتحاد میں شامل کانگریس نے اپنا دامن جھاڑتے ہوئے کنارہ کشی اختیار کرلیا ہے۔

وزیر اعلیٰ ایچ ڈی کمار سوامی نے حال ہی میں کہاتھاکہ شمالی کرناٹک کی ترقی کے لئے ننجنڈپا کمیٹی سفارشات کے مطابق ترقی کے لئے کئی قدم اٹھائے جانے کے باوجود بھی پچھلے اسمبلی انتخابات میں اس علاقے کے عوام نے جنتادل (ایس) کی طرف سے کوئی توجہ نہیں دی ، ایسی صورت میں اس علاقے کو نظر انداز کئے جانے کی شکایت پر وہ توجہ کیسے دیں۔ وزیر اعلیٰ کے اس بیان پر کانگریس کے حلقوں میں داخلی طور پر شدید برہمی کا اظہار کیا جارہاہے، جس کی وجہ سے کانگریس اس معاملے میں کمار سوامی سے دور ہی رہنا پسند کررہی ہے۔ علاحدہ شمالی کرناٹک کے مطالبے پر زور دینے کے لئے جہاں 2؍ اگست کو بند کا اعلان کیا گیا ہے کانگریس نے پہلے ہی اپنے تمام کارکنوں کو ہدایت دے دی ہے کہ اس مجوزہ بند میں ہرگز حصہ نہ لیں۔

بی جے پی کے بعض عناصر شمالی کرناٹک کے 13، اضلاع میں اس مجوزہ بند کو کامیاب کرنے کی کوشش میں ضرور ہیں لیکن کانگریس نے واضح طور پر اپنے سبھی قائدین اور کارکنوں کو ہدایت دی ہے کہ وہ اس مجوزہ بند کا حصہ ہرگز نہ بنیں۔ اس دوران وزیراعلیٰ ایچ ڈی کمارسوامی کی طرف سے شمالی کرناٹک کو نظر انداز کئے جانے کے متعلق بیان پر عوام کا شدید غم وغصہ سامنے آرہا ہے۔ایسے میں متحد ہوکر کانگریس اس علاقے میں عوام کی امنگوں کے مطابق کام کرنے کی جدوجہد پر متوجہ رہے گی۔ اس علاقے کے سبھی قائدین نے علاحدہ شمالی کرناٹک کے مطالبے سے اپنے آپ کو دور رکھتے ہوئے اس بات سے اتفاق کیا ہے کہ وزیر اعلیٰ کمار سوامی کو ایسا بیان نہیں دینا چاہئے تھاکہ شمالی کرناٹک کے عوام نے ان کی پارٹی کو ووٹ نہیں دیا اسی لئے بجٹ میں شمالی کرناٹک کی طرف توجہ نہیں دی گئی۔