نئی دہلی:9/دسمبر (ایس او نیوز/آئی این ایس انڈیا)دہلی کے وزیر اعلی اور عام آدمی پارٹی کے کنوینر اروند کیجریوال پیر کو ہونے والی اپوزیشن جماعتوں کی اہم میٹنگ میں شامل ہوں گے۔کیجریوال پہلی بار اس طرح کی کسی میٹنگ کا حصہ ہوں گے۔آپ ذرائع نے بتایا کہ یہ میٹنگ آندھرا پردیش کے وزیر اعلی این چندرا بابو نائیڈو نے بلائی ہے اور وزیر اعلی اروند کیجریوال اس میٹنگ میں شامل ہوں گے۔یہ اجلاس ایک کوشش ہے جس میں بی جے پی مخالف ساری جماعتوں کو جمع کر کے باہمی اختلافات کودور کرکے ایک بڑا اتحاد 2019 کے لوک سبھا انتخابات کے لئے بنایا جائے گا۔حالانکہ آپ ذرائع کے مطابق یہ میٹنگ 2019 کے لوک سبھا انتخابات کی حکمت عملی پر بحث کرنے کے لئے بلائی گئی ہے۔اس کا اتحاد جیسے مسائل سے کوئی لینا دینا نہیں ہے۔بتا دیں کہ 2019 کے لوک سبھا انتخابات کے پیش نظر مہاگٹھ بندھن میں اہم کردار نبھانے والی مایاوتی کے اپوزیشن پارٹیوں کی میٹنگ میں شامل نہ ہونے کا خدشہ ظاہر کیا جارہا ہے۔کانگریس ذرائع نے بتایا کہ مایاوتی کے نمائندے ستیش چندر مشرا کو منانے کی کافی کوشش کی گئی مگر کامیابی نہیں ملی۔ان کا کہنا ہے کہ اس کے پیچھے راجستھان اور مدھیہ پردیش میں بی ایس پی کے ساتھ اتحاد نہ ہونا ہو سکتا ہے۔بتا دیں کہ اپوزیشن پارٹیوں کے درمیان بات چیت میں شامل رہنے والے ایک سینئر لیڈر نے بتایا تھاکہ چندرا بابو نائیڈو نے گزشتہ ماہ ہی یہ میٹنگ بلائی تھی۔ہم نے ان سے گزارش کی تھی کہ اسے تھوڑا بعد میں رکھا جائے کیونکہ زیادہ تر لوگ تشہیرکاری میں مصروف رہیں گے۔ جہاں بی ایس پی اس اجلاس سے ندارد ہو سکتی ہے وہیں ٹی ایم سی کی ممتا بنرجی، آر جے ڈی کے تیجسوی یادو، سماج وادی پارٹی کے اکھلیش یادو اور ایچ ڈی کمارسوامی یا ان کے والد دیوگوڑا شامل ہو سکتے ہیں۔