شہر سے ایرپورٹ کیلئے میٹرو ٹرین پراجکٹ کا احیاء
بنگلورو۔14؍جنوری (ایس او نیوز)شہر کے کیمپے گوڈا انٹرنیشنل ایرپورٹ تک میٹرو ٹرین خدمات قائم کرنے کے منصوبے کا احیاء کرتے ہوئے ریاستی حکومت نے مرکزی حکومت کے اشتراک سے اس پراجکٹ کو آگے بڑھانے پر آمادگی ظاہر کی ہے۔ آج مرکزی وزیر مملکت برائے شہری ہوا بازی جینت سنہا کے دورۂ بنگلور کے دوران شہر بنگلور سے ایرپورٹ تک میٹرو ٹرین خدمات قائم کرنے کے سلسلے میں تبادلۂ خیال کیاگیا۔ وزیر برائے ترقیات بنگلور کے جے جارج نے ریاستی حکومت کے اعلیٰ افسران کے ہمراہ اس پراجکٹ کے متعلق بات چیت کی۔ ملاقات کے بعد اخباری نمائندوں سے بات چیت کرتے ہوئے مسٹر جارج نے بتایاکہ ریاستی اور مرکزی حکومتوں کے اشتراک سے اس پراجکٹ کو پورا کیا جائے گا۔ ریاستی حکومت کی اس تجویز پرمرکزی وزیر نے مثبت رویہ ظاہر کیا اور آنے والے دنوں میں بنگلور ایرپورٹ تک میٹرو ٹرین خدمات کوتیزی سے مکمل کرانے کیلئے فنڈز کی فراہمی اور دیگر منظوریوں کا تیقن دیا۔مسٹر جار ج نے بتایاکہ بنگلور کے مختلف حصوں سے ایرپورٹ تک 30 کلومیٹر طویل میٹرو ٹرین خدمات کے منصوبے کو روبہ عمل لانے کے سلسلے میں انہوں نے آج مرکزی وزیر سے تفصیلی بات چیت کی ۔انہوں نے کہاکہ فی الوقت شہر سے ایرپورٹ تک پہنچنے کیلئے چھ الگ الگ روٹس کی نشاندہی کی گئی ہے، اس کے تمام نقشے مرکزی حکومت کو روانہ کئے جائیں گے اور مرکز کی منظوری کے بعد اس پراجکٹ کو عملی شکل دی جائے گی۔انہوں نے کہاکہ ریاستی اور مرکزی حکومت مشترکہ طور پر اس پراجکٹ کو 50 فیصد سرمایہ فی کس کے حساب سے مکمل کریں گے۔ انہوں نے کہاکہ میٹرو ٹرین خدمات کس روٹ سے چلائی جائے اس پر عوامی رائے بھی حاصل کی جائے گی۔ انہوں نے کہا کہ پراجکٹ شروع ہونے کے بعد چھ سال میں اسے مکمل کرلیا جائے گا۔میٹرو ٹرین پراجکٹ پر چھ ہزار کروڑ روپیوں کی لاگت آئے گی۔ شہر میں مضافاتی ٹرین خدمات کے متعلق جارج نے بتایا کہ اس کا پہلا مرحلہ شروع کردیا گیا ہے اور شہر سے وائٹ فیلڈ تک مضافاتی خدمات فی الوقت جاری ہیں۔ شہر کے دیگر علاقوں میں بھی ان خدمات کی شروعات کیلئے 360کروڑ روپیوں کی مرکز سے امداد طلب کی گئی ہے۔یہ رقم ملنے کے بعد شہر بنگلور اور دیگر چھ مضافات کیلئے ٹرین شروع کردی جائے گی۔ آج کی میٹنگ میں محکمۂ ترقیات بنگلور ، محکمۂ شہری ترقیات ، میٹرو اور دیگر محکموں کے افسران موجود تھے۔