بھٹکل انجمن کالج آف ایجوکیشن کے زیراہتمام ’سٹی زن ٹریننگ کیمپ ‘کا آغاز : طلبا کے لئے دیہی زندگی کامطالعہ ازحد ضروری
بھٹکل: 3؍نومبر (ایس او نیوز)انجمن کالج آف ایجوکیشن بھٹکل کے زیر اہتمام بی ایڈ طلبا کے لئے دو روزہ ’’ شہری تربیتی کیمپ ‘‘ کا بروز سنیچر 3نومبر کو کالج کیمپس میں آغاز ہوا۔
افتتاحی تقریب میں بھٹکل اے سی ایف بال چندرا نے مہمان خصوصی کی حیثیت سے خطاب کرتے ہوئے کہاکہ طلبا پر ملک کو مضبوطی کے ساتھ ترقی کی طرف لے جانے اور سنوارنےکی اہم ذمہ داری ہے۔ جدید دنیا میں طلبا کے لئے بہت سارے مواقع اور سہولیات میسر ہیں۔ طلبا کو اپنی منزل پانے میں جہاں سخت محنت کی ضرورت ہے وہیں میدان سے وابستگی اور سرگرمی بھی بہت ضروری ہونے کی بات کہی۔ بلاک ایجوکیشن آفیسر ایم آر منجی نے اعزازی مہمان کے طورپر طلبا سے کہاکہ جو طلبا اپنی منزل کو پانا چاہتے ہیں ان کے لئے ضروری ہے وہ اپنے سماج ، معاشرے کی عزت کریں۔ طلبا اپنے فرائض کو جان کر عمل کریں۔ طلبا ان خصوصیات کو اپنائیں گے تو انہیں معاشرے میں ایک عزت والا مقام حاصل ہوگا۔ انہوں نے سابق صدر ہند اے پی جے عبدالکلام کی مثال پیش کرتے ہوئے کہاکہ انہوں نےا پنے فرائض کو بخوبی انجام دیاتو انہیں صدر ہند کا عہدہ ملا۔ انجمن حامئی مسلمین بھٹکل کے نائب صدر سید عبدالرحمن باطن نے پروگرام کی صدارت کی۔انجمن کے ایڈیشنل جنرل سکریٹری اسحق شاہ بندری نے بھی اپنے خیالات اظہار کیا تو کالج بورڈ سکریٹری آفتاب قمری ڈائس پر موجود تھے۔
کیمپ کی شروعات سکینڈ ائیر کی طالبہ ریشما خاتون کی تلاوت قرآن مع ترجمہ سے ہوا۔ انگریزی میں ریشماخاتون اور اردو میں مشفقہ نے ترجمہ پیش کیا۔ فسٹ ائیر بی ایڈ کی طالبہ غزالہ نے ہدیہ نعت پیش کی تو سکینڈ ائیر کی طالبات نشااور ساتھیوں نے استقبالیہ ترانہ پیش کیا۔ سکینڈائیر بی ایڈ کی طالبہ ودیا نائک نے استقبال کیا۔ کالج پرنسپال ڈاکٹر زکیہ زرزری نے شہری تربیتی کیمپ کی غرض وغایت پیش کرتے ہوئے اہم مقاصد پر روشنی ڈالی۔ سکینڈ ائیر کے متعلم عرفات لشکری اور فسٹ ائیر کے سنیل کمار نے مہمان خصوصی اوراعزازی مہمان کا تعارف پیش کیا۔ سکینڈ ائیر کے منجوناتھ نے شکریہ اداکیا۔
دوپہر میں طلبا کے لئے آرٹ اینڈ کرافٹ کا ورکشاپ اور ثقافتی پروگرام منعقد کئے گئے ۔ جس میں بطور مہمان گورنمنٹ ہائی اسکول سونار کیری بھٹکل کے آرٹ اینڈ ڈرائینگ ٹیچر مہیش نائک نے ورکشاپ کے ذریعے طلبا میں فن کاری کے گُر بتائے۔ اس پروگرام میں فسٹ ائیر کی طالبہ شاہینہ نے مہمان کا تعارف پیش کیاتو پی اے انیسہ نے نظامت کے فرائض انجام دئیے اور ودیا شری نے کلمات تشکر اداکئے۔