سپریم کورٹ:آسام میں شہریت اور غیر قانونی تارکین وطن کا معاملہ آئینی بنچ کو منتقل
نئی دہلی،21فروری(ایس او نیوز/آئی این ایس انڈیا)آسام ناگرکتا فیڈریشن کی جانب سے آسام میں شہریت اورغیر قانونی تارکین وطن کو لے کر دائر درخواست پر سماعت کرتے ہوئے سپریم کورٹ نے اس معاملے کو آئینی بنچ کوریفرکر دیاہے۔چیف جسٹس جے ایس کھیہر کی صدارت والی بنچ نے کیس کوآئینی بنچ کو ریفری کرنے کا فیصلہ کیا۔شہریت قانون کی دفعہ 6 (اے)کی آئینی حیثیت اور آسام میں داخل ہو رہے غیرقانونی تارکین وطن کی شہریت کامعیارکیا ہو؟۔ یہ طے کرنے کے لئے درخواست دائر کی گئی ہے۔شہریت طے کرنے کے لئے پہلا سوال یہ ہے کہ جو بنگلہ دیشی 1951میں ہندوستان آئے انہیں شہریت دی جائے یا جو 1971کے بعدآئے انہیں۔دوسرا یہ کہ جو غیر ملکی 1971کے بعد ہندوستان میں پیدا ہوئے انہیں شہریت دی جائے یا نہیں۔پٹیشن میں کہاگیاہے کہ مرکز اور ریاستی حکومت نے اب تک اس بارے میں کوئی رخ فیصلہ نہیں کیا ہے۔